"Арсенал" релсга қайтди

Чемпионлик ўйини.

Ниҳоят «Арсенал» чемпионлик ритмини ушлади. Ўйинда икки бор ҳисобда ортда бориб, 90+3 дақиқада ғалаба голини урган лондонликлар ўз рельсларига ажойиб тарзда қайта олишди. Бу ғалабанинг олдингиларидан қийматли томони шундаки, жамоа йиқилиб қайта тура олди. Йиқилиб қайта тура олиш эса руҳий томонлама катта куч тақдим қилади. «Арсенал»нинг бугунги ўйини бир неча йил аввалги «Ливерпул»нинг чемпионлик мавсумидаги ҳаракатларига ўхшаб кетди. Ўзи АПЛда чемпион бўлишнинг бошқа йўли ҳам йўқ. Маҳорат ва истеъдоднинг ўзи камлик қилади. Чемпионликни мақсад қилган жамоа, руҳий томонлама юқори даражада бўлиши лозим. Бугунгача “тўпчилар” шу жабҳада оқсаётганди.

Топқир Артета.

Мураббийлар ўртасидаги курашда Унай Эмери Артетага ютқазди. Артета қилган ўзгаришларнинг барчаси ишлади. Ўйини чиқмаётган, адаптацияда муаммога учраётган Троссар ўрнига туширилган Мартинелли бир гол урди ва 90+3 дақиқада Жоржинёни яхши вазиятга олиб чиқди. Томиясу, Тирней, Виера умуман барча мураббий ишончини оқлади. Артета олдинги ўйинлардан фарқли Мартин Эдегорни гарчи чарчаб қолган бўлсада захирага олмади бу ҳам жамоа фойдасига ишлади.

Муаммолар.

Ўнг қанот ҳимояси бўйича саволлар очиқлигича қолмоқда. Уайт ва Томиясу стабил, ишончли ўйин кўрсата олмаяпти. Леандро Троссар қанот ҳужумида ўзини яхши ҳис қилмаяпти. Аксига олиб Сака ҳамда Мартинеллида чарчоқ аломатлари кўринмоқда. Жоржинё бўйича муаммолар йўқ (ҳозирча), италиялик “тўпчилар” тизимига тезда қоришиб кетди. Буёғига лазаретдагилар сафга қайтса, Микелнинг бошўгриқлари анча камаяди.

Жалолиддин Халилов.