АПЛ. "Йўлбарслар" бу сафар "хўрак" бўлишадими, Шекспир қаламини синдириш кимга насиб қилади? 32-тур превьюси

Қуйида ана шу турга бағишланган превьюни эътиборингизга ҳавола этамиз.

АПЛ, 32-тур
"Тоттенхэм" – "Уотфорд"
08.04.2017, 16:30
"Уайт Харт Лэйн"
Бош ҳакам: Энтони Тейлор (Манчестер)

"Тоттенхэм" ўтган турда "Суонси"ни сўнгги дақиқаларда таслим этган эди. Бу Почеттино шогирдларининг кетма-кет бешинчи ғалабалари бўлди. Ҳозирча, улар "Челси"га бироз бўлсада, рақобат қилиб турган ягона жамоа бўлиб туришибди. Бу мавсум "шпорлар" уйда ютқазишмаган.

"Уотфорд" эса иккита ўйиндан бери ғалаба нашидасини сурмоқда. Лекин, мезбонларнинг ҳозирги формаси ва уйдаги статистикасидан келиб чиқилса, бу учрашувда яққол устунлик "Тоттенхэм" тарафида бўлади.

Қизиқ:

- "Тоттенхэм" Премьер-лигада "Уотфорд"га ҳеч қачон ютқазмаган (5 ғалаба, 2 дуранг);
- "Шпорлар" АПЛда кетма-кет 15та ўйиндан бери мағлубият нималигини билишмаяпти (13 ғалаба, 2 дуранг, 0 мағлубият);
- Трой Дини "Уотфорд" таркибида 41та турли клублар дарвозасини ишғол қилган, лекин "Тоттенхэм"га тўртта ўйинда ҳам гол ура олмаган.



"Манчестер Сити" – "Халл Сити"
08.04.2017, 19:00
"Этихад Стэдиум"
Бош ҳакам: Жонатан Мосс (Йоркшир)

"Манчестер Сити" охирги ҳафталарда оғир тақвимдан азият чекди. ЕЧЛда "Монако", АПЛда "Ливерпуль", "Арсенал" ва "Челси" билан ўйнади. Ана шу ўйинларда жами 2 очко жамғарди. Гвардиола шогирдлари тўрт турдан бери ғалаба қозонмаяпти ва чемпионлик учун имкониятлари амалда қолмади. Бугунги рақиб эса жамоа ўзига келиб олиши учун яхши "хўрак" бўлиши мумкин.

"Халл Сити" Марко Силва келгач, ўзини ўнглаб олди. Лекин, бугун уларнинг имкониятлари анча паст.

Қизиқ:

- "Халл Сити" Премьер-лигада "Манчестер Сити"га қарши тўққизта ўйиндан фақат биттасини ютган (5 мағлубият, 3 дуранг, 1 ғалаба);
- "Шаҳарликлар" ҳужумчиси Серхио Агуэро "Этихад Стэдиум"да кечган охирги 30та Премьер-лига ўйинида 25та гол урган;
- Марко Силва бош мураббий этиб тайинланганидан кейин фақат "Челси" (23), "Тоттенхэм" (23) ва "Эвертон" (21) "Халл" (17)дан кўпроқ очко жамғарган.



"Мидлсбро" – "Бернли"
08.04.2017, 19:00
"Риверсайд Стэдиум"
Бош ҳакам: Мартин Аткинсон (Лидс)

"Мидлсбро" Премьер-лигага қайтиш учун узоқ курашди ва бу мавсум олдидан буни уддалади. Мавсумни яхши бошлаган жамоа, кейинчалик ўзини йўқотиб қўйди. Айни пайтда "Боро" 23 очко билан 19 ўринда бормоқда.

"Бернли" ўз майдонида очколарни йиғишни давом эттирмоқда. Олдинги турда жамоа "Сток Сити"ни 1:0 ҳисобида енгди. Бироқ, сафарда Шон Дайч шогирдлари ўзларини кўрсата олишмайди.

Қизиқ:

- "Мидлсбро" "Риверсайд Стэдиум"да кечган охирги бешта чемпионат ўйинида ғалаба қозона олмаган (3 дуранг, 2 мағлубият);
- Алваро Негредо бу мавсум Премьер-лигада жамоасининг 11 голида иштирок этди (7 гол, 4 голли пас).



"Сток Сити" – "Ливерпуль"
08.04.2017, 19:00
"Британниа"
Бош ҳакам: Майк Дин (Хесволл)

"Сток Сити" чемпионатда 4 турдан бери ғалаба қозона олмаяпти. Стабилликни ушлай олмаётган клуб айни пайтда пастга шўнғишда давом этмоқда.

"Ливерпуль" 5 учрашувдан бери мағлубият нималигини билмаяпти. Лекин, охирги турда "Борнмут" билан 2:2 ҳисобида дуранг қайд этилгач, чемпионлик пойгасидан деярли чиқиб кетди.

Қизиқ:

- "Ливерпуль" Премьер-лигада "Сток Сити"га қарши охирги еттита ўйиндан олтитасида ғалаба қозонган;
- "Сток" АПЛда сўнгги тўққизта уй учрашувидан фақат биттасини ютқазган (4 ғалаба, 4 дуранг, 1 мағлубият);
- Жонатан Уолтерс Премьер-лигада "Ливерпуль"га олти бор гол урган.



"Вест Бромвич" – "Саутгемптон"
08.04.2017, 19:00
"Хауторнс"
Бош ҳакам: Крис Кавана (Ланкашир)

"Вест Бромвич" ўйинни сусайтириб юборди. Охирги бешта баҳсда жамоа бор йўғи 4 очко жамғарди. Камига ана 5 учрашувдан 4тасида Тони Пьюлис шогирдлари гол ҳам уришмаган.

"Саутгемптон" олдинги турда "Кристал Пэлас"ни 3:1 ҳисобида мағлуб этди ва бу турга яхши кайфиятда етиб келди. "Авлиёлар" уй жамоаси ҳисобланишади.

Қизиқ:

- "Вест Бромвич" АПЛда "Саутгемптон"га қарши охирги еттита баҳсдан бештасида гол ура олмаган;
- "Бромвич" Премьер-лигада сўнгги 10та уй учрашувидан саккизтасида ғалаба қозонган.



"Вест Хэм" – "Суонси"
08.04.2017, 19:00
"Олимпийский"
Бош ҳакам: Кевин Френд (Лестершир)

"Вест Хэм" охирги еттита турда бор йўғи 2 очко жамғаришди. Жамоа ҳозир оғир аҳволда. Кетма-кет 5 ўйиндан бери фақат ютқазишмоқда. Билич жамоасида ҳимоячилар жуда ёмон ўйнашмоқда.

"Суонси" охирги 4 турда 1 очко йиғган. Олдинги ўйинда "Тоттенхэм"ни 88 дақиқага қадар 1:0 ҳисобида мағлуб эта туриб, якунда 1:3 ҳисобидаги мағлубиятни тан олишга мажбур бўлди. Иккита омадсиз жамоалар баҳсида мезбонлик эвазига кичик устунликни "Вест Хэм"га бериш мумкин.

Қизиқ:

- "Вест Хэм" Премьер-лигада "Суонси"га қарши охирги 8та ўйиндан фақат биттасида имкониятни бой берган (4 ғалаба, 3 дуранг, 1 мағлубият);
- Энди Кэрролл "Суонси"га қарши сўнгги олтита Премьер-лигада ўйинида бешта гол урган ва учта голли пас берган.



"Борнмут" – "Челси"
08.04.2017, 21:30
"Виталити Стэдиум"
Бош ҳакам: Андре Марринер (Бирмингем)

"Борнмут" чемпионатда 5 турдан бери мағлубият нималигини билмаяпти. Ана шу беллашувларда 2та ғалаба ва 3та дуранг қайд этилди. Мезбонлар уйда яхши ўйин кўрсатишади.

"Челси" олдинги турда чемпионлик учун даъвогарлардан бири бўлган "Манчестер Сити"ни мағлуб этди (2:1) ва амалда уларни бош соврин учун курашдан чиқариб юборди. Бу қарама-қаршиликда устунлик Конте шогирдлари томонида бўлади.

Қизиқ:

- "Челси" Премьер-лигада охирги 12та сафар ўйинидан фақат биттасини ютқазган (9 ғалаба, 2 дуранг, 1 мағлубият);
- Эден Азар "Борнмут"га қарши сўнгги учта ўйинда учта гол урган;
- Жошуа Кинг "Виталити Стэдиум"даги охирги бешта баҳсда тўртта гол урган ва битта голли пас берган.



"Сандерленд" – "Манчестер Юнайтед"
09.04.2017, 17:30
"Стадиум оф Лайт"
Бош ҳакам: Крейг Поусон (Лондон)

"Сандерленд" турнир жадвалининг сўнгги поғонасини эгаллаб турибди, камига таркибда жароҳатларган сони кўп. Мавсумнинг ҳал қилувчи палласида Мойес қўл остидаги ўйинчилардан максимал фойдалана олмаяпти. Бу аҳволда жамоа Чемпионшипга равона бўлади.

"Манчестер Юнайтед" узоқ вақтдан кейин олтинчи ўриндан юқорига кўтарилган эди. Аммо, охирги иккита учрашувдаги дуранг Моуриньо шогирдларини яна олтинчи поғонага қайтарди. Шунга қарамай, "қизил иблислар" АПЛда 20 турдан бери мағлубиятга учрамаяпти.

Қизиқ:

- "Сандерленд" Премьер-лигада "Манчестер Юнайтед"га 22 бор мағлуб бўлган;
- МЮ Премьер-лигада сўнгги саккизта сафар ўйинидан олтитасини ютган ва умуман ютқазмаган;
- Златан Ибрагимович АПЛда охирги 7та сафар учрашувида саккизта гол урган.



"Эвертон" – "Лестер"
09.04.2017, 20:00
"Гудисон Парк"
Бош ҳакам: Роберт Мэдли (Йоркшир)

"Эвертон" 2017 йилни кўтаринки руҳда давом эттирмоқда. Бир қатор етакчилар жароҳат олганига қарамай, Куман ишонч билдираётган ёшлар ўзларини йўқотиб қўйишмаяпти. "Ирислар" бу мавсум уйда фақат бир марта ютқазишган.

Крейг Шекспир ҳақиқий сеҳргар. Унинг бошқарувида жамоа ҳозирча 100 фоизлик натижа қайд этиб келаяпти. "Гудисон Парк"да кечадиган эртанги баҳс "Лестер" учун ҳақиқий синов бўлади.

Қизиқ:

- Кевин Мираллас Премьер-лигада "Лестер"га қарши охирги учта ўйинда ҳам гол урган;
- Крейг Шекспир Премьер-лигада Пеп Гвардиола ва Карло Анчелоттидан кейин дастлабки олтита ўйинда ғалаба қозонган мураббийга айланиши мумкин.



"Кристал Пэлас" – "Арсенал"
10.04.2017, 23:59
"Селхерст Парк"
Бош ҳакам: Майкл Оливер (Нортумберленд)

"Кристал Пэлас" кетма-кет ғалабалардан кейин ўтган турда "Саутгемптон"га имкониятни бой берди. Сэм Эллардайс клубга келгач, жамоани хавфли ҳудуддан олиб чиқишга эришди. Энди ана шу ҳолатни сақлаб қолиш керак.

"Арсенал" эса олдинги ўйинда ниҳоят ғалабасиз сериясига якун ясади. Дарвозани учинчи дарвозабон Мартинез қўриқлади. Катта эҳтимол билан бу сафар ҳам Венгер айнан унга ишонч билдиради. "Арсенал" ҳали тўртталикка кириш имкониятини йўқотмаган.

Қизиқ:

- "Кристал Пэлас" АПЛда "Арсенал"га қарши охирги 15та ўйиндан фақат биттасини ютган (1 ғалаба, 3 дуранг, 11 мағлубият);
- "Арсенал" Премьер-лигада "Пэлас"га сафарда умуман мағлуб бўлмаган (6 ғалаба, 5 дуранг);
- Оливье Жиру "Селхерст Парк"да кечган сўнгги учта ўйинда гол уришнинг уддасидан чиққан.

Англия Премьер-лигаси турнир жадвали >>> АПЛ


Толибжон Қосимов