Андрей Демченко: "Хатоларимиз сабабли ютқаздик"

- Учрашувда биринчи бўлиб гол ўтказиб, кейин уни ғалабага айлантирганимиз кишини қанчалик хурсанд қилган бўлса, якунда ҳатто дурангни ҳам ушлаб қола олмаганимиз, шунчалик хафа қилди. Ваҳоланки, биз шу куни майдонга фақат ғалаба учун чиққандик ва қолаверса, бунга лойиқ ўйин намойиш қилгандик, бироқ айрим сабаблар якунда бир очкодан ҳам маҳрум бўлишимизга олиб келди.

Хўш қандай сабаблар? Эътибор берган бўлсангиз, ҳисобда олдинга чиқиб олганимиздан кейин йигитлар ҳужумга ўтиб кетишди ва ўз-ўзидан ҳимояда бўш зоналар пайдо бўлди. Рақиб бундан унумли фойдаланди. Дарвозамиз томон йўллаган аниқ зарбаларининг деярли 95 фоизи голга айланди. Ҳужумга ўтдик, аммо ҳимояда тартибли ҳаракат қила олмадик. "Концентрация"ни йўқотдик. Боз устига, йигитларга чарчоқ аломатлари ҳам кузатилди. Балки беллашув 16:00да бошлангани ҳам бунга сабабдир?! Яна билмадим. Энг асосийси сабаб шуки, ўз хатоларимиз туфайли ғалабани қўлдан чиқардик.