"Андижон"нинг собиқ мураббийи жамоа ўтган йили Ўзбекистон кубоги финалига қандай тайёргарлик кўрганини айтди

- Мураббийлар кўпинча: "Биз ҳар бир ўйинга бир хил тайёргарлик кўрамиз", деган гапни такрорлашади. Бу ростми? Ўзбекистон кубоги финалига тайёргарликда қандайдир фарқлар бўлганми?

- Машғулот жараёни ва тактика борасида ҳамма нарса бир хил. Бу ерда мураббийлар ёлғон гапирмайди, бу ҳақиқат: барча ўйинларга чиндан ҳам бир хил тайёргарлик кўриш керак. Рақибни ўрганасиз, унинг кучли ва заиф томонларини аниқлайсиз, шунга қараб машғулот режасини тузасиз. Лекин ҳиссий жиҳатдан бу бутунлай бошқа даража. "Андижон" ва клуб мухлислари учун илк бор шундай кучли ҳиссиёт пайдо бўлганди. Худди шу нарса футболчиларга ҳам тааллуқли – менимча, ўша таркибдан фақат Владимир Бубанья Ўзбекистон кубоги соҳибига айланган (2018 йилда ОКМК билан – СА изоҳи).

- Ўйинчиларни қандай руҳлантирдингиз? Балки рақибдан қўрқмаслик кераклигини айтгандирсиз?

- У ерда қўрқадиган ҳеч нарса йўқ эди: биз финалдан олдинроқ Суперлига доирасида "Навбаҳор"ни ўз майдонимизда 3:0 ҳисобида енгган эдик. Ҳеч ким ҳеч кимдан қўрқмасди. Ўша тўқнашув финал бўлишидан ташқари, водий дербиси ҳам эди. Шунинг учун футболчиларни қўшимча руҳлантириш шарт эмасди. Ичимизда ҳис-туйғулар жўш урарди. Жамоа "куйиб кетиши"дан жуда хавотирда эдик. Аммо футболчиларнинг кўзларидан ўйинга тайёр эканликлари сезилиб турарди. Финалдан уч кун олдин Александр Хомяков билан гаплашиб олдик. У: "Матбуот ходимимиз қани? Келинг, финал олдидан ота-оналар, қариндошлар, рафиқалар, болаларнинг тилакларини видеога муҳрлаймиз. Фақат бу ҳақда футболчилар билмасин", деди.

"Андижон" матбуот ходими Шуҳрат жуда яхши иш қилди. Кўплаб кичик видеолар тайёрлади, кейин уларни бирлаштирди. Видео ўйиндан икки кун олдин тайёр бўлди, кўрдим – жуда таъсирли чиқибди. Ўйиндан бир кун олдин назарий машғулотда "Навбаҳор"нинг ҳимоядаги ўйинини таҳлил қилдик. Машғулот охирида чироқни ўчириб, катта экранда ўша видеони қўйдик. Бу ўйинчиларга жуда қаттиқ таъсир қилди, гарчи унча ҳиссиётли одам бўлмасам-да, ҳаттоки мен ҳам таъсирландим. Ўйлайманки, бу бизга ҳам маълум даражада ёрдам берди.

Артём Петросян иштирокидаги "Финт Тўраева" подкастининг тўлиқ версияси билан қуйидаги ҳавола орқали танишишингиз мумкин (рус тилида):