Андижонда ёш футболчилар ўртасида илк бора “З.М. Бобур Кубоги” Республика мусобақаси ўтказилди

Сўнги пайтларда ёш футболчилар ўртасида ташкил қилинаётган турнирларда кўплаб иқтидорлар сайқалланиб бормоқда.

Андижон вилоятида илк бора Ўзбекистон футбол ассоциацияси ҳамда вилоят футбол ассоциацияси томонидан “З.М. Бобур Кубоги” Республика очиқ мусобақаси ташкил этилди. Унда юртимизнинг турли вилоятларидан ташриф буюрган 2005-2006 йилларда туғилган футболчилардан иборат жамоалар иштирок этдилар.

Водийнинг уч вилояти жамоалари ўртасидаги баҳслар кескин курашларга бой тарзда ўтди. Турнирнинг ярим финалига марғилонлик футболчилар ҳамда Андижонинг уч жамоаси етиб келди. Финал ўйинида эса, Андижон футбол академияси жамоаси, ихтисослашган болалар ва ўсмирлар спорт мактаби вакиллари куч синашди. Якунда рақибига ҳеч қандай имкон қолдирмаган футбол академияси жамоаси ғолиб бўлди.

Мусобақанинг тантанали ёпилиш маросими байрам руҳида ташкил этилганига алоҳида эътибор қаратдик. Гимнастикачиларнинг чиқишлари, шарқ яккакураши билан шуғулланувчи спортчиларнинг кўргазмали дастури намойиш қилинди.

Тадбирда сўз олган вилоят футбол ассоциацияси биринчи вице-президенти Бекзодбек Каримов,  Ўзбекистон футбол ассоциацияси, болалар футболини ривожлантириш бўлими мутасаддиси Нодирхўжа Юлдашевлар ёш футболчиларга кўрсатган ўйинлари учун ташаккур билдирдилар. Вилоят спорти ва футбол фахрийлари мусобақанинг анъанавий бўлиб қолишига тилак билдиришди.

Ғолиб ва совриндорларга кубок ва медаллар тантанали тарзда топширилди.
     
Элмурод Эрматов, Андижон