Алишер Азизов: “Ўтган йил “Қизилқум”ни мағлуб этгандик, бу сафар ҳам шунга интиламиз”

- Бугунги ўйинда фақат ғалаба учун майдонга тушамиз. Чунки орқага йўл йўқ. Ўтган турларда жамоамиз ўзидан ёмон таассурот қолдирмаган бўлса-да, натижалар биз ўйлагандек бўлмади. Футболда эса натижа бирламчи саналади. Шунинг учун бугунги ўйинда қандай қилиб бўлмасин "Қизилқум"ни мағлуб этишимиз керак, - дейди ҳужумчи.

- Жамоа мавсумолди ўртоқлик учрашувларида анча сермаҳсул ўйин кўрсатган эди. Аммо миллий чемпионатда ҳозирча рақиблар дарвозасига йўл топа олгани йўқ. Буни қандай изоҳлайсиз?
- Аввалги ўйинларда жамоа ҳимояга жиддий эътибор қаратган ҳолда натижа учун тўп тепди. "Қизилқум"га қарши ўйинда янгича тактикада ҳаракат қиламиз ва ўйлайманки бугун жамоа ўзининг нохуш анъанасига барҳам беради.

- "Обод" ўтган йили кубок баҳсларида навоийликлардан устун келганди...
- Бу сафар ҳам рақибимизни енгишга ҳаракат қиламиз. Жамоамизда кайфият аъло ва шу руҳиятни ўйиндан кейин ҳам сақлаб қолишга интиламиз.

- Жароҳатингиздан фориғ бўлиб улгурдингизми? Бугун асосий таркибда майдонга тушишингиз мумкинми?
- Ҳа, жароҳатдан қутилдим. Майдонга тушиш-тушмаслигимни эса мураббийлар ҳал қилишади.

"Обод" матбуот хизмати