Алиризо Бейранванд: "Бундай имкониятни қўлдан чиқариш керак эмас"

Маълумки, 3 ноябрь куни Японияда "Кашима Антлерс" ва "Персеполис" клублари ўртасида Осиё чемпионлар лигасининг дастлабки финал баҳси бўлиб ўтади. Алиризо Бейранванд учун жорий мавсум омадли ўтмоқда. У ОЧЛда бир неча бор ўз дарвозасини муқаррар голлардан сақлаб қолди.

"Аҳмадризо Абедзаде ва Нассер Хежази буюк дарвозабонлар бўлишган, - дейди Бейранванд. - Мен ҳам улардан кўп нарса ўрганишга ҳаракат қилганман. Мен уларга ўхшай олмайман, чунки улардек бўлиш осон эмас. Нассер Хежазининг ўғли ҳозир мен билан битта жамоада ўйнаяпти. Мен у билан яхши муносабатдаман".

"Агар Осиё чемпионлар лигасини қўлга киритсак, бу ҳам юртимиз, ҳам жамоамиз учун катта муваффақият бўлади. Бизда ажойиб жамоа бор. Биз ҳужум қилишни ҳам, ҳимояланишни ҳам биламиз. Жаҳон чемпионатидан сўнг бор эътиборимни "Персеполис"га қаратиб келяпман. Қишда эса Осиё Кубоги диққат-марказимизда бўлади".

"ОЧЛ - юқори савиядаги мусобақа, бунда барча жамоалар ғолиб чиқишни истайди. Агар ОЧЛда муваффақият қозонсак, шундан сўнг клубни тарк этиш ҳақида ўйлаб кўришим мумкин. Мен Европага йўл олишни ва катта клублардан бирида ўйнашни хоҳлайман", - дейди 26 ёшли эронлик дарвозабон.