"Пахтакор"га қойилмақом гол урган "Ал Ҳилол"нинг италиялик юлдузи АГМКга қарши ўйнамайди

Эътиборли жиҳати, "Ал Ҳилол" мусобақанинг ўтган мавсумида "Пахтакор" билан 1 гуруҳдан ўрин олган эди. Ўшанда жамоалар ўртасидаги 1-ўйинда ҳисоб очилмаган, 2-баҳс саудияликларнинг 2:1 ҳисобидаги ғалабаси билан якунланган эди.

"Ал Ҳилол" 3 очколик бўлган баҳсда саудияликларнинг италиялик юлдузи Себастьян Жовинко "шерлар" дарвозасини чиройли тарзда ишғол қилгани ёдингизда бўлса керак (жарима зарбасидан).

ОЧЛ 3-турида киритилган иккита шедеврни суратлар кетма-кетлигида томоша қилинг

 34 ёшли Жовинко ОЧЛнинг жорий мавсум гуруҳ босқичида иштирок этмайдиган бўлди. Боиси шундаки, у "Ал Ҳилол"нинг ОЧЛ учун қайдномасидан ўрин олмаган. Саудияликлар легионерлар лимитини қуйидаги футболчилар билан тўлдиришди: Бафетимби Гомис (Франция), Андре Карильо (Перу), Жан Хён-Су (Жанубий Корея) ва Лусиано Вьетто (Аргентина).

Жовинко Разван Луческу мураббийлиги даврида жамоанинг асосий фигураси эди.  Бироқ, руминиялик мутахассис 15 февраль куни жамоани тарк этгач, унинг ўрнини бразилиялик Рожерио Микале эгаллади. Янги мураббий Жовинкога деярли ишонч билдирмаяпти. Италиялик футболчи сўнгги бор 11 март куни майдонга туширилган эди. Араб матбуотининг хабарига кўра, Себастьянни ОЧЛ учун рўйхатдан ўтказмаган Микале жамоа раҳбариятидан Жовинко билан амалдаги шартномани узайтирмасликни сўраган. Италиялик футболчи катта эҳтимол билан декабрь ойида клубни тарк этади.