Акром Комилов: "Тезкор гол ура олсак, уёғи осонроқ бўлишини билардик"
06 mar 2016 20:31
News

Акром Комилов: "Тезкор гол ура олсак, уёғи осонроқ бўлишини билардик"

"Бунёдкор" - "Нефтчи" учрашувидан сўнг "қалдирғочлар" ҳимоячиси Акром Комилов фикрлари билан ўртоқлашди.

"Чемпионатнинг биринчи ўйини доимо оғир кечади ва биз бунга тайёр эдик. Рақиб - "Нефтчи", ўтган мавсумда Тошкентда бизни енгиб кетган жамоа эканлигини эслаб, икки баробар куч билан ҳозирлик кўрдик. Бугунги ўйинда барча яхши ҳаракат қилди ва биз ғалабага эришдик. Мавсумни 3 очко билан бошлаш ёқимли.

Тезкор гол ура олсак, уёғи осонроқ бўлишини билардик. Шунингдек, мураббийлар ҳам иложи борича тезроқ гол киритишни уқтиришганди. Буни уддаладик ва ўйин тизгини бизнинг қўлимизда бўлди.

Икки ёки уч тўп фарқи билан олдинда бораётган бўлсак, тўпни рақибга бермай, ўз назоратимизда ушлаб туришимиз тўғрисида учрашувдан аввал мураббийларимиз кўрсатма беришганди", - деди Акром Комилов.

Омонжон Тўхтамирзаев ёзиб олди