Миржалол Қосимов: "Ҳужум чизиғи мен учун ҳам бош оғриғи бўляпти"

Ушбу машғулотлардан сўнг терма жамоа бош мураббийи Миржалол Қосимовдан бир қатор саволларга жавоб олдим.

- Қатар билан бўлиб ўтган ўйин ҳақида гаплашишдан аввал, нима учун иссиқ пайтда араб давлатларида ўртоқлик учрашуви ўтказишга рози бўлганингизни билмоқчи эдим.
- Сабаби оддий. Австралияда январда айнан мана шундай об-ҳаво ҳукмрон бўлади. Яшил қитъада ҳам намгарчилик юқори бўлиши аниқ. Ўша пайтда у ерда ёз фасли бошланган бўлади. Чиниқиш ва иқлим шароитига кўникиш мақсадида мазкур йиғинни ташкил этдик. Қатар билан учрашувда легионерларимиз иштирок этишмади. Бу ўйинда айнан намликни енгиб ўта олган футболчи яхши ўйнаши мумкин. Характерни енга олиш керак, мен йигитларга ишонаман. Аслида икки жамоанинг бир хил шароитда ўйнаганлигини ҳам рад этмаслигимиз керак. Биринчи ва учинчи голлар оддий ҳолатларда киритилди.

- Саудия Арабистони ва Қатар билан ўйинларда оддий голларни ўтказиб юборяпмиз...
- Тактик ва техник хатолар бўляпти. Консентрация йўқроқ, назаримда. Кечаги голларда ҳам ҳимояда жиддий хатолар бўлди.

- Кейинги иккита ўйинда Янги Зеландия билан бўлиб ўтган баҳсни кўрамизми? Бўлажак икки учрашувда натижага эътибор қаратиладими ёки ўйинни шакллантиришга?
- Ўйинни шакллантирамиз. Биринчи рақамда ўйнаймиз, балки хатолар бўлар, аммо танлаган тактикамизни такомиллаштиришимиз керак.

- Бу йиғинларда сиз таркибда кўришни истаган қайси футболчилар қатнаша олмаяпти?
- Виталий Денисов Тошкентга келди, аммо унинг жароҳати бор экан. Александр Мерзляковни ҳам синаб кўрмоқчи бўлгандим, афсуски, баъзи сабабларга кўра у ҳам биз билан эмас.

- Инчеондан келиб чиқиб, ҳужумда муаммолар борлигини кўрдик. Нафақат Осиё ўйинларида ўйнаган футболчилар, балки ҳозирги миллий терма жамоада ҳам. Рақобатни ошириш мақсадида режаларингиз борми?
- Баҳодир Насимов. Аммо у ўйин амалиётисиз. Эронга кетганида хурсанд бўлган эдик, афсуски амалга ошмади. Ҳужумда яна Камолиддин Мурзоев ва Александр Гейнрих бор. Ҳужум чизиғи мен учун ҳам бош оғриғи бўляпти.

- Шу санаб ўтган футболчиларни кейинги йиғинларда синаб кўрасизми?
- Албатта. Қишдаги йиғинга уларни таклиф этишни режалаштирганман.


Нодирхўжа Юлдашев
Дубай