Равшан Эрматов: "Ўзбекистон март ойида КОНМЕБОЛ, КОНКАКАФ ва Африка жамоалари билан ўйнайди"

"ЖЧда миллий терма жамоамиз илк бор иштирок этади. Албатта, пухта тайёргарлик кўриш жуда зарур. Гуруҳимиздаги рақиблар ўта жиддий — Португалия, Колумбия ва плей-офф ғолиби бўладиган Африка жамоаси. Умуман олганда, мундиалда кучсиз терма жамоанинг ўзи бўлмайди. Ҳамма рақиблар ўзига яраша кучли. Пухта тайёргарлик кўриб, ҳар бир рақибга қарши муносиб ўйин кўрсатишимиз керак. 

Январь ойида Қатарда йиғин олиб борилади. Март ойида ФИФА билан ҳамкорликда FIFA Series лойиҳаси доирасида Жанубий Америка (КОНМЕБОЛ), Марказий Америка (КОНКАКАФ) ва Африка жамоалари билан ўйинлар ташкил этилади. Бу борада музокаралар давом этмоқда. Мазкур халқаро мусобақа Тошкентда ўтади. 

FIFA Series иккита ярим финал, 3-ўрин учун баҳс ва финални ичига олади. Шундан сўнг май ойида Ўзбекистонда 2 ҳафталик ўқув-йиғин машғулотлари ўтказилади. Тахминан 20-25 май оралиғида тайёргарлик Канадада давом эттирилади. Бу вақт тафовутига кўникишга хизмат қилади. Канада терма жамоаси билан ўртоқлик ўйини ўтказамиз. Келишувга эришилиб, шартнома тузилган. 

Июнь бошига келиб биз терма жамоа қароргоҳи айнан қайси шаҳарда бўлишига аниқлик киритиб оламиз. У ерда якуний тайёргарлик бўлади ва мундиаль олдидан сўнгги ўртоқлик баҳси ҳам ўтказилиши режалаштирилган. Ҳаммаси инобатга олинган ва айни пайтдаги тахминий режаларимиз шундай кўриниш олган. Бошқача тўхтамга келиш учун ФИФА кунлари йўл қўймайди, футболчиларимиз клублари ихтиёрида бўлади", – деди Эрматов.

Аввалроқ Ўзбекистон Канада билан ўртоқлик ўйинида майдонга тушиши эълон қилинган эди.