Сергей Лушчан: "Ҳассага таянган кампир майдонга чиқса ҳам олтита гол урарди"

- Ўйин ҳақида фикрингиз?

- Ўйин ҳақида нима дейишим мумкин, биз 0:5 ҳисобида мағлуб бўлдик. Биринчи таймни жуда расво ўтказдик. Натижа ҳаққоний, агар сен ҳимояни ўйламай футбол ўйнасанг натижаси шунақа бўлади. Балки олтита гол ўтказишимиз ҳам мумкин эди.

Рақибни ғалаба билан табриклайман. Жамоамизда ҳар томонлама муаммолар етарли: қарздорликдан тортиб шартномаларгача. Ўйлайманки, яқин орада жамоага эътибор қаратилиб вазият яхши томонга ўзгаради. Тўғрисини айтсам, баъзи футболчиларимиз учун мавсум тугади. Чунки улар жамоа учун эмас, жамоага қарши футбол ўйнашяпти. Вазиятни ўзгартиришга ҳаракат қиляпмиз, лекин ўхшамаяпти.

- Учрашув статистикасини кўрганимизда "Навбаҳор" кўп жиҳатлар бўйича олдинда эканлиги кўринди. Лекин таблодаги ҳисоб бунинг акси бўлди. Балки жамоангиз ўйнашни хоҳламадими?

- Яна қайтариб айтаман, бугунги ўйиндан кейин ярим жамоа учун мавсум тугади. Чунки баъзилар бугун рақиб фойдасига ҳаракат қилишди. Мен буни бошқача тушунтириб бера олмайман. Ҳаммасини таҳлил қиламиз.

- "Бухоро"дан шундай қаршилик кутганмидингиз?

- Қандай қаршилик ҳақида гапиряпсиз? Биз ўзимизга ўзимиз бешта гол олиб келдик. Агар ҳассага таянган кампир майдонга чиқса ҳам олтита гол урарди. Албатта, осон бўлмаслигини билардик, рақибни ҳурмат қиламиз. Лекин ўйинни кўринг, фақат ўзимиз ютқаздик.

- Тезкор голлар ҳам ўйинга ўз таъсирини ўтказдими?

- Яна қайтарайми? Бизда бугун майдонда фақат уч киши футбол ўйнади. Еттита ўйинчимиз умуман ўйнамади. Тўғри, қарздорлик бор, балки бошқа клубларда ҳам бордир. Жамоа учун ўйнамаслик бугун бошлангани йўқ. Иккинчи давра бошланибдики, жамоага қарши ўйнаш давом этяпти. Нималар бўлаётганини тушунмаяпман. Биринчи даврадаги жамоадан асар қолмаган.