1 тадан гол ва ассистга муаллифлик қилган футболчи, жамоаси мағлубиятга учрамаслигини таъминлаган посбон — Суперлигада 22-тур лауреатлари

"Сурхон" посбони Артём Потапов "Championat.asia" сайти талқинига кўра 22-турнинг энг яхши дарвозабони деб топилди. 

Термизликлар дарвозабони 22-турда кўплаб сейвларни амалга ошириб, жамоаси Фарғонада "Нефтчи" билан дуранг (1:1) ўйнашида катта ҳиссасини қўшди. Легионер футболчи дарвозасини ишончли тарзда қўриқлагани учун тур дарвозабони бўлишга эришди.  

"Пахтакор" ҳимоячиси Дилшод Саитов "Championat.asia" талқинида 22-турнинг энг яхши футболчиси дея эълон қилинди.  

Майдонда ўзининг фаол ҳаракатлари билан ажралиб турган Дилшод Саитов 1 та гол ва 1 та ассист қайд этиб, "Турон" устидан қозонилган йирик ғалабада жонбозлик кўрсатди. 

"Пахтакор" аъзоси Дилшод Саитовнинг олис масофадан "Турон" дарвозасига киритган тўпи "Championat.asia" талқинига кўра 22-турнинг энг чиройли голи (ВИДЕО) деб тан олинди. 

Қанот вакили "Турон" билан баҳсда чамаси 25 метрдан зарба бериб, Ҳумоюншох Сайётовни ожиз қолдирди ва ҳисобни очди.

"Насаф" бош мураббийи Рўзиқул Бердиев "Championat.asia" талқинига кўра 22-турнинг энг яхши мураббийи сифатида эътироф этилди.

Қаршиликлар ушбу тур меҳмонда "Навбаҳор"ни мағлуб этишди (1:0). Тур марказий баҳсида жамоасини ғолиблик сари етаклагани боис Бердиев ҳақли равишда тур мураббийига айланди.