Суперлиганинг 27-тур учрашувларида ҳакамлик хатолари кузатилдими?

✅ "Навбаҳор" – "Насаф"

Такрорий лавҳанинг битталигига асосланиб, 100% сариқ карточка эканлигини айтиш қийин. Тўғри, ҳимоячи томонидан орқа ва ён томондан кечикиб ташланган подкат ҳолати мавжуд. Аммо бу ерда атайлаб қилинган қўполлик, ортиқча куч ишлатиш ёки сапчишни кўрмаяпман. Ёрдамчи ҳакам бир неча метр нарида юзма-юз турибди, шунинг учун ҳакамнинг қарорига ишониш учун барча асослар мавжуд.

✅ "Навбаҳор" – "Насаф"

Агар вазият голга айланганда, уни бекор қилиш керак эди. Тўп қўл билан қабул қилингандан сўнг, у табиий ҳолатда бўлса ҳам, дарҳол зарба йўлланган.

✅ "Навбаҳор" – "Насаф"

Тўпнинг дарвоза чизиғига теккани ва тўлиқ кесиб ўтмаслигига ишончим комил. Иккинчи такрордан бу яхши кўриниб турибди. VAR'да тўп дарвоза чизиғидан ўтгани ҳақида ҳеч қандай далил мавжуд эмас.

✅ ❌ "Навбаҳор" – "Насаф"

Эҳтимол, бироз олдинроқ ҳуштак чалиниши керак эди. Ўйин сўнгида "Насаф" футболчиси (Черан) шубҳасиз қўпол ўйин кўрсатди, бу сариқ карточкага лойиқ ҳаракат. Сўнгра "Навбаҳор"нинг 17-рақамли ўйинчиси (Жиянов) спортга хос бўлмаган хатти-ҳаракати (туртиш) учун сариқ карточка билан жазоланиши лозим эди. "Насаф"нинг 22-рақамли ўйинчиси (Голбан) эса бунга жавобан кўрсатган реакцияси учун сариқ карточка олиши керак эди.

✅ "Динамо" – "Хоразм"

Гол тўғри ҳисобга олинди. Ўйиндан ташқари ҳолат йўқ: на қанотдан узатма берилганда, на дарвозага зарба берилаётган пайтда. Ҳужумчи ушбу лаҳзада тўғри позицияда турганди.

✅ "Динамо" – "Хоразм"

Майдон чизиғига эътибор қаратиб, олисдаги ҳимоячининг пас берилаётган пайтда ҳужумчига қараганда дарвоза чизиғига яқинроқ эканлигини кўряпман, демак, ўйиндан ташқари ҳолат йўқ. Яхшиямки, ёрдамчи ҳакам тавсияларга мувофиқ ҳужумни якунланишига имкон бериб, сўнгра қарор қабул қилди.

✅ "Динамо" – "Хоразм"

Ҳакамнинг сариқ карточка кўрсатиш қарорига қўшиламан. Фол эҳтиётсиз тарзда амалга оширилди, ҳимоячи подкат ташлашга кечикди, аммо оёқлари ерда, букилган ва ортиқча куч ишлатилмаган. На бутсанинг таг қисми билан зарба, на эзиш ҳолати мавжуд. Бу вазият гол уриш имкониятидан очиқдан-очиқ маҳрум қилиш эмас, чунки ҳолат ўткир бурчакда содир бўлган, қолаверса, яна бир ҳимоячи бор эди. Фол жарима майдони чизиғида эмас, балки жарима майдонигача бўлган ҳудудда содир этилган, бу ҳам кўриниб турибди.

✅ "Шўртан" – ОКМК

Ҳакамнинг пенальти белгилаш қарорини маъқуллайман. Ҳужумчи бир лаҳзага ҳимоячидан олдинга ўтиб, ўнг оёғи билан тўпга ўйнади, сўнгра ҳимоячи ортдан унинг оёқларини чалиштириб, йиқитди. Бу карточкасиз қоида бузилиши ҳисобланади.

✅ "Андижон" – "Бухоро"

Ҳакам гўёки устунлик тамойилини жуда яхши қўллагандек кўринди, у имо-ишора қилмай, ҳужумнинг якунланишига имкон берди. Ҳа, эҳтиётсизлик туфайли қоида бузилди: сирпаниб тўпга ташланган ўйинчи мақсадига етди, сўнгра ҳимоячи унинг болдир қисмига тегиб кетди, аммо тўқнашувни юмшатишга уриниб, енгил зарба берди. Бу карточкасиз қоида бузилиши эди, лекин тўп ўша жамоада қолди.

✅ "Нефтчи" – "Сурхон"

Ҳакамнинг голни ҳисобга олиш қарорини қўллаб-қувватлайман. Иккала ўйинчи ҳам таналарини бир-бирига қарши қўйиб ўйнаш ниятида ҳаракат қилди, лекин шундай бўладики, ҳимоячи тўқнашувдан четга чиқиб қолди. Бу вазиятда қўшимча қўл ҳаракатлари ёки орқага туртиш ҳолатлари кўзга ташланмади.

✅ "Сўғдиёна" – "Қизилқум"

VAR вазиятга тўғри аралашди ва пенальти белгиланди. Ҳужумчи оёғи билан тўпни тепганидан сўнг, қўл танага кўндаланг, чўзилган ва ғайритабиий ҳолатда эди. Пенальти белгилаш учун барча мезонлар мавжуд.

❌ "Сўғдиёна" – "Қизилқум"

VAR'нинг аралашуви ўринли. Қўполлик тўпиқдан юқори қисмда содир этилган. Оёқ синиши мумкин эди, бутсанинг тишлари қурол сифатида ишлатилган, яккакурашга киришиш тезлиги юқори ва ҳужумчининг таянч оёғи нишонга олинган. Менимча, бундай жиддий қоидабузарлик учун қизил карточка кўрсатилиши керак.

✅❌ "Машъал" – "Қўқон-1912"

Тўғри қарор - симуляция учун сариқ карточка. VAR аралашуви ўринли. Ҳужумчи рақиб посбони билан тўқнашувга киришмасдан олдиноқ оёқларини букиб, ҳакамни алдаш мақсадида дарвозабон томон йиқилишни бошлайди. Бу контактли симуляция. Ҳакамнинг жойлашуви жуда ноқулай эди.

✅ "Пахтакор" – "Бунёдкор"

Бу шунчаки муқаррар тўқнашув эди. Ҳужумчи режалаштирилган зарбани амалга оширди, тўп дарвозабоннинг танасига тегиб кетди. Кейин муқаррар тўқнашув содир бўлди, бу бахтсиз ҳодиса эди.

Шу тариқа, 27-тур учрашувларида ҳакамлар учта хатога йўл қўйди.