ЖЧ-2014. Мундиал иштирокчилари - Гана

Гана терма жамоаси мундиалдаги ўзининг илк иштирокини 2006 йилда Германияда ўтказилган Жаҳон чемпионатидан бошлаган. Айнан ўша чемпионат улар учун дебют саналади. Ўзининг илк иштирокидаёқ Гана гуруҳ босқичидан ўтади ва 1/8 финалда Бразилияга имкониятни бой бериб, Жаҳоннинг энг кучли 16 жамоасидан бирига айланишади. Кейинчалик ЖАРда бўлиб ўтган чемпионатда ҳам Гана йўлланмани қўлга киритида ва ўзининг иккинчи уринишида натижани яхшилашга эришишади.

Гана Жанубий Африка Республикасида ўтказилган чемпионатда чорак финалга қадар бораади. Чорак финалда улар Уругвай билан тўқнаш келишади. Бу учрашув жуда кўпчиликни ёдида қолган бўлиши керак. Луис Суарезнинг "анти-қаҳрамонлиги" "қаҳрамонлик"ка айланган эди. Гана терма жамоаси учрашув сўнггида Уругвай дарвоза олдида бир неча хавфли вазиятлар яратади. Шуларнинг бирида тўп яққол дарвозадан ўрин олаётган бир паллада, Уругвай ҳужумчиси Луис Суарез қўли билан тўпни бартараф этади. Бош ҳакам эса ўйлаб-ўтирмасдан Суарезга қизил ва Уругвай дарвозаси томон пенальти белгилайди. Учрашувнинг сўнгги сониялари. Сураез кийиниш хонасига кириб кетишга шошилмаяпти. Тўп олдида Асамоа Гьян. Бироқ Асамоа Гьян тепган кучли зарба дарвоза тусинига тегиб қайтади ва Гана шундоққина ғалабани илиб кета олмайди. Сўнгра пенальтилар сериясида омад жанубий америкаликларга кулиб боқади ва Гана ўз юришини чорак финалда тўхтатишга мажбур бўлади. Гана терма жамоаси вакиллари эса бошлари баланд кўтарган ҳолда ўз юртларига қайтишади. У ерда эса уларни ўз мухлислари ва ватандошлари катта хурсандчилик ила кутиб олишади.

Ҳақиқатдан ҳам Гана жуда чиройли ва мардонавор ўйин кўрсатган эди. Аслида улар бир оёқлари билан ярим финал остонасида туришган эди. Аммо омад шу куни Гана рақиби Уругвай томонида бўлганини айтиб ўтиш жоиз. 

Гананинг ушбу натижаси ҳам жуда катта шов-шувга сабаб бўлади. Ушбу терма жамоа сўнгги 10 йил ичида жуда катта юксалишга эришди. Гана таркибидан жаҳон тан олган бир қатор юлдузлар етишиб чиқишди ва етишиб чиқишмоқда. Эссьен, Мунтари, Квадво Асамоа, Асамоа Гьян, Айю, Кевин-Принц Боатенг сингари футболчилар Европанинг кучли чемпионатларида муносиб ҳаракат қилишмоқда. Айнан шу футболчилар ҳозирда терма жамоанинг узагини ташкил этишади. 

Гана кетма-кет учинчи бор мундиалга чиптани қўлга киритди ва Африка жамоалари ичида сўнгги йиллардаги энг яхши натижани қайд этмоқда. Гана чорак финалга қадар етиб борган Африканинг учинчи жамоаси бўлди. Бунгача Камерун ва Сенегал терма жамоалари ушбу натижага эриша олишган.
Гана терма жамоаси қатнашган иккита мундиалда ҳам АҚШ билан рўбару келишган ва ҳар иккаласида ҳам Гана АҚШни 2:1 ҳисобида таслим этган. 2006 йилги чемпионатда гуруҳ босқичида дуч келишган бўлса, 2010 йилда нимчорак финалда учрашишган. Тақдирни қарангки, бу сафарги мундиалда ҳам Гана ва АҚШ бир гуруҳдан жой олишди. Лекин бу сафар уларни иккаласига ҳам анча қийинроқ бўлиши табиий. Сабаби, уларга Германия ва Португалия каби тажрибали терма жамоалар қаршилик қилишади. Яна бир қизиқ ҳолат шуки, Гана ўтган мундиалда ўз гуруҳида Германия билан ўйнаган ва кичик ҳисобда мағлуб бўлган эди. Бу сафар ҳам эски-танишлар ўзаро учрашишади. Гана учун гуруҳдаги иккита рақиб яхши таниш. Фақатгина Португалия билан улар илк бор дуч келишмоқда. 

Гана юлдузлари - Гьян ва Боатенг

Гана таркибида ҳаракат қилаётган Кевин-Принц Боатенгнинг укаси Жером Боатенг Германия шарафини ҳимоя қилади. Бу ака-укалар ўтган мундиалда тўқнаш келишган ва унда Жером ғалабани илиб кетган эди. Шунингдек, бу иккала ака-укалар бундеслига баҳсларида ҳам ўзаро баҳс олиб боришди. Унда ҳам "Бавария" сафида ҳаракат қилаётган Жером Боатенг акасидан устун келди. Бу сафарги жангда ким ғолиб бўлишини эса вақт кўрсатади.
Бу ака-ука қарама-қаршилиги мундиал тарихидаги илк тўқнашув бўлса ажаб эмас. Янаямки, кетма-кет иккинчи бор. Кевин-Принц Боатенг ва Жером Боатенг Жаҳон чемпионати тарихига кириб бўлишган. Шуни таъкидлаб ўтиш керакки, бу икки ака-ука фақат майдонда рақиб саналишади. қолган пайтларда эса бир-бирларини кераклигича қўллаб-қувватлаб туришади.

Гана терма жамоаси мундиалда қандай ўйнаш кераклигини яхши билади. Таркиб жиҳатдан ҳам улар анча бойишган ва етарли ижрочиларга эга.  Улар осон бўлмаган анча жиддий гуруҳдан ўрин олишди. Лекин уларни имкониятларини пасайтириб юборишга ҳали эрта. Бунга ўтган иккита мундиал ҳам яхшигина мисол бўла олади.



Гананинг ЖЧ ўйинлари:

ЖЧ-2006
1. Италия - Гана 2:0 (гуруҳ босқичи)
2. Чехия - Гана 0:2 (гуруҳ босқичи)
3. Гана - АҚШ 2:1 (гуруҳ босқичи)
4. Гана - Бразилия 0:3 (нимчорак финал)

ЖЧ-2010
1. Сербия - Гана 0:1 (гуруҳ босқичи)
2. Гана - Австралия 1:1 (гуруҳ босқичи)
3. Гана - Германия 0:1 (гуруҳ босқичи)
4. Гана - АҚШ 2:1 (нимчорак финал)
5. Уругвай - Гана 1:1 (пенальтилар серияси 4:2) (чорак финал)


Гана терма жамоаси шу кунгача Жаҳон чемпионатларида умумий ҳисобда тўққизта ўйин ўтказишган ва шуларнинг тўрттасида ғалаба нашидасини сўришган бўлса, учта ўйинда мағлубиятга учрашган ва қолган икки ўйин дуранг натижаси билан якун топган. Тўплар нисбати: 9-10.


Гана терма жамоаси ҳақида:

Ташкил топган йил: 1950

Минтақаси: Африка

Бош мураббий: Жеймс Квеси Аллиа

Жамоа сардори: Майкл Эссьен

Энг кўп ўйин ўтказган футболчи: Ричард Кингсон (90 ўйин)

Энг яхши тўпурар: Асамоа Гьян (42 гол)

ФИФА рейтингидаги ўрни: 24

Илк ўйин: Гана - Нигерия 1:0 (1950 йил)

Энг йирик ғалаба: Кения - Гана 0:13 (1965 йил)

Энг йирик мағлубият: Болгария - Гана 10:0 (1968 йил)

Эришган ютуқлари:  
Африка миллатлар кубоги соҳиби: (1963, 1965, 1978, 1982)


Гана терма жамоаси якуний таркиби:

Дарвозабонлар – Квараси ("Стремсгодсет", Норвегия), Дауда ("Орландо Пайретс", ЖАР), Адамс ("Адуана Старз");

Ҳимоячилар – Инкоом ("Платаниас", Греция), Опаре ("Стандард", Бельгия), Аффул ("Эсперанс", Тунис), Бойе ("Ренн", Франция), Менса ("Эвиан", Франция), Сумаила ("Мамелоди Сандаунз", ЖАР);

Ярим ҳимоячилар – Эссьен ("Милан", Италия), Рабиу ("Кубань", Россия), Баду ("Удинезе", Италия), Асамоа ("Ювентус", Италия), Мунтари ("Милан", Италия), Адома ("Мидлсбро", Англия), Вакасо ("Рубин", Россия), Атсу ("Витесс", Голландия), А. Айю ("Марсель", Франция), Акуа ("Парма", Италия);

Ҳужумчилар – Гьян ("Аль-Айн", БАА), Боатенг ("Шальке", Германия), Уорис ("Валансьен", Франция), Ж. Айю ("Сошо", Франция).   


Шаҳбоз Беғамов тайёрлади.