"Ё ютишимиз керак, ё умуман футбол ўйнамаслигимиз керак" (Одил Аҳмедов, отангга минг раҳмат!)

Энди асл масалага келадиган бўлсак, кеча бўлиб ўтган Хитой - Ўзбекистон ўйинидан кейин терма жамоамиз сардори Одил Аҳмедов жуда таъсирчан гапларни гапирди. Мен Одилни қанчадан вақтдан бери билсам, унинг бунчалик ғазаба билан гапирганини энди биринчи бор кўриб туришим. 

Мағлубиятли ўйинлар кўп бўлган, лекин кечагидек аламлиси... Кечаги ўйин ҳал қилувчи баҳс эди. Жаҳон чемпионатига чиқиш учун Хитойни ютишимиз шарт эди. Лекин ютқазиб қўйдик ва энди ҳаммаси ўз қўлимизда эмас. Бу аҳволда эртага Жанубий Корея ҳам ютиб кетади. 

Одил Аҳмедов ўйиндан кейин интервью берар экан, ялтоқланиб ўтирмади. Отасига минг раҳмат, аламидан шартта-шартта гапириб ташлади. Бабаян икки йил давомида айтмаган гапларни Одил кечаги ўйиндан сўнг икки дақиқа ичида айтди-қўйди. Ҳам ғазабдан гапирди, ҳам аламдан, ҳам афсус-надомат билан. 

Негадир Бабаяннинг ўйинолди ва ундан кейинги фикрларини ўқисам ўзим учун умуман янгилик олмайман. Хитойга қарши баҳсдан олдин айтган гапларига қаранг, нима эмиш Липпи келиб жамоа кучайтибди. Одам ҳайрон қолади, хўп кучайса кучаяр, шуни энди матбуотга айтиш шартми? Мураббий дегани ундан кўра ўз жамоаси ҳақида гапирмайдими? 

Жуда кўп халқаро ўйинлар олдидан ва ундан кейинги матбуот анжуманларида қатнашганман. Лекин ҳеч қайси мураббий Тошкентга келиб, сизларда "Бунёдкор" стадиони бор, бир пайтлари Ривалдо, Сколарилар ишлаб кетган демаган. Ҳаммаси ўз жамоаси ҳақида гапиради. Лекин Бабаян учун Липпи бирламчи. Унинг жаҳон чемпиони бўлгани қизиқ. У келгач, Хитой футболида ўзгариш бўлгани муҳим.

Ўйиндан кейин ҳам шу гап: омад келмади, ўйинни бошқардик, пенальтидан гол ўтказиб юбордик, ва ҳоказо. Яна нима эмиш, Бабаян ўйиндан кейин Липпининг олдига бориб, уларга омад кулиб боққанини айтганмиш. Қизиқ, Липпининг Бабаян билан нима иши бор? 

Самвел Бабаян (биздаги бошқа аксарият мураббийлар қатори) доим ўйиндан олдин ва кейин кундалик ("дежурный") гапларни гапириб келади. Масалан, ўзим ҳеч қачон конкрет гапларни, одамнинг юрагини ўйнатиб юборадиган фикрларни эшитган эмасман. Аммо Одил Аҳмедовга гап бўлиши мумкин эмас! У кечаги гаплари билан ҳаммани оёққа турғазди, ухламанглар, уйғонинглар, футбол ўйнанглар, ахир жаҳон чемпионати ёнимиздан ўтиб кетяпти демоқчи бўлди. 

Унинг гапларини видеода кўрар эканман, бошда жуда таъсирландим, шу билан бирга ачиндим ҳам. Жаҳон чемпионатида Одилдан кучсиз юзта футболчи ўйнайди. Лекин бизнинг қоракўз ўғлон бу сафар ҳам мундиалдан четда қоладими? Аҳмедов айтганидек, кечаги мағлубият учун ҳеч қандай баҳона йўқ, ҳаммасига ўзимиз айбдормиз. 

Кеча кайфият зўр эди. Худога шукур бугун ҳам яхши. Ўлкамиз бўйлаб Мустақиллик байрами, Ҳайит айёми кенг нишонламоқда. Аммо терма жамоа барибир кўнгилларни хира қилди. Энди жаҳон чемпионати ҳақида ўйламасак ҳам бўлаверади. Жаҳон чемпионатига боришни мақсад қилган жамоа кеча Хитойни ютиши шарт эди, вассалом. 

Х.Холиқов.