Ярослав Крушельницкий "Андижон" сафига қўшилди

Бугун машғулотларнинг учинчи куни ўтмоқда. Қолаверса, таркибга янги ўйинчиларнинг қўшилиши ҳам давом этяпти.
Фарруҳ Турдиалиев, Элдор Исабоев, Санжар Асқаралиев, Абдумалик Абдуллаев, Иқбол Акрамов, Азиз Алижонов, Тимур Яфаров, Шукур Жумабоев каби янги ўйинчилар машғулотларда иштирок этишаётганини хабар қилгандик. Бугун куннинг биринчи ярмида Андижонга тажрибали ҳимоячи Ярослав Крушельницкий ҳам етиб келди. Ўтган йили Малайзияда ўйнаган Крушельницкий учун “Андижон” бегона жамоа эмас. Ёдингизда бўлса, у 2007 йилги мавсумда ҳам андижонликлар сафида тўп сурган. Маҳоратли ҳимоячи “Андижон”дан ташқари олий лигада “Академия”, “Пахтакор”, “Навбаҳор”, “Қизилқум” ва “Шўртан” жамоаларида ҳам фаолият олиб борган.

Эътиборлиси, “Андижон”да у айнан Эдгар Гесснинг қўл остида тўп сурган. Бугун куннинг иккинчи ярмида Крушельницкий машғулотларда иштирок этишни бошлайди.