Яҳё Гулмуҳаммади: "Гуруҳдан чиқиш қийин бўлади, аммо биз бу вазифани бажариш учун бор кучимизни ишга соламиз"

"Бугунги баҳс оғир кечишини билган эдик. Ҳар икки жамоа тажовузкор ўйин кўрсатди. Ҳимоядаги тартибли ҳаракат туфайли бу натижага эришдик. Футболчиларим бугун борини бериб ўйнашди, улардан мамнунман.

Ҳар икки жамоада гол киритиш учун имкониятлар бўлди. Дарвозабонлар баҳснинг энг яхши футболчилари бўлишди. Ўзбекистонда 1 очко қўлга киритганимиздан хурсандман. Бизнинг майдонда бўладиган учрашув бугунгидан осонроқ кечади. Йигитларим билан фахрланаман.

"Бунёдкор", "Лаҳвия, "Ал Наср" Осиёнинг кучли клублари деб ўйлайман. Гуруҳдан чиқиш қийин бўлади, аммо биз бу вазифани бажариш учун бор кучимизни ишга соламиз.

Биринчи бўлимда ҳимояда тартибли ўйин кўрсатишга ҳаракат қилдик. Учрашувнинг иккинчи ярмида рақиб жамоа 3 нафар ҳужумкор футболчини майдонга туширди. Босим бўлгани сабабли ҳужумга кўп ўтмадик.

Эрон футболига келадиган бўлсак, мамлакатимиз клублари барқарор ўйин кўрсатмаётганига кўплаб сабаблар бор. Уларнинг асосийси, шароитларда оқсаяпмиз. Футболга кўпроқ эътибор беришларини истаймиз.

Саудия Арабистони клубларига қарши баҳсга тўхталадиган бўлсак, бу ҳақда ҳеч қандай маълумотга эга эмасман. ОФК бизга бу учрашув нейтрал майдонда бўлишини маълум қилди" - дейди мураббий.

Учрашувнинг энг яхши футболчиси Муҳаммадрашид Мазаҳери (дарвозабон):

Бугун 3 очко учун майдонга тушган эдик, аммо қўлга киритилган 1 очко ҳам ёмон эмас деб ўйлайман.

Мени энг яхши деб танлаган йигитларга раҳмат. Ушбу учрашув якунланди ва энди кейинги баҳс ҳақида ўйлаймиз.