“Хоразм” – “Орол” учрашуви майдондаги дарвозалар туфайли 1,5 соат кеч бошланди

Урганчда маҳаллий “Хоразм” жамоаси Нукуснинг “Орол” клубини қабул қилди. Унда майдон эгалари 4:1 ҳисобида ғалаба қозонди. Мазкур ўйиннинг бошланиш вақти аслида соат 17:00га белгиланган эди. Аммо баҳс соат 18:00да бошланди. Хўш, бунга нима сабаб бўлди? Учрашувдан сўнг “Хоразм” устози Александр Ежов билан суҳбатлашганимизда, шу ҳақда ҳам сўрадик.

-  Аввало чемпионатнинг ўз майдонимиздаги илк учрашувини ғалаба билан бошлаганимиздан хурсандман ва бу билан жамоамиз ишқибозларини табриклайман. Албатта, ҳар бир жамоа учрашувдан олдин майдонга фақат ғалаба қозониш мақсадида чиқади. “Орол”га қарши ўтган ўйинимизда ҳам шогирдларим ўз мухлисларимиз қаршисида ўйнаётганимизни хис этиб, уч очко жамғариш илинжида харакат қилди. Якунда ўз ниятимизга етдик. Ўйиндан кўнглим тўлди.

-  Гарчи йирик ҳисобда ғалаба қозонган бўлсакда, учрашув жамоамиз учун осон ўтмади. Қизиқарли ва жангавор тарзда ўтган беллашувда омад бизга кулиб боқди. Албатта, камчиликлар ҳам йўқ эмас. Айрим сабабларга кўра, қишки йиғинларни юқори савияда ўтказа олмаганимиз расмий ўйинлар чоғида ўз сўзини айтмоқда. Яъни йигитларнинг жисмоний холати кўнгилдагидек эмас. Эндиликда имкон қадар бу каби камчиликлар устида ишлаб, уларни бартараф этишга уринамиз.

-  “Орол”га қарши ўйинимиз деярли 1,5 соатдан кейин бошланди. Бунга сабаб эса майдондаги дарвозаларнинг стандарт холатда эмаслигидир. Қисқа фурсат ичида муаммо бартараф этилиб, бироз кечикиб бўлса ҳам ўйинни ўтказиб олдик. Мени хурсанд қилган жиҳати, ўйиннинг кеч бошлангани ҳудди Европа майдонларидаги ўйинларга ўхшашиб кетди. Стадион ёритгичлари талаб даражасида ва бу томондан ҳеч қандай муаммо бўлмаганини айтиб ўтишим керак.

Исломбек Рустамбеков ёзиб олди