Воҳид Холбоев: "Шундай ҳакамлик бўлса, Про-лига савияси кўтарилади"

"Учрашувгача рақибларимиз ҳақида маълумотларга эга эмасдим. 1-бўлим давомида майдон эгаларининг ўйинларидан керакли хулосаларни чиқардим. Танаффус пайтида йигитларга керакли кўрсатмаларни бердим. Футболчилар ўз олдиларига қўйган вазифаларини ортиғи билан бажара олишди. Шогирдларимнинг ҳаракатларидан тўлиқ қониқиш ҳосил қилдим. Умуман олганда биринчи бўлимда бироз қийналдик. Нега десангиз, тайм давомида кучли шамолга қарама-қарши ҳаракатландик.

Ҳакамлик? Уларга ҳеч қандай эътирозимиз йўқ. Агарда имконият берилганида уларга 5 баҳо қўйган бўлардим. Ҳакамлар бригадасининг майдонда борлиги деярли сезилмади. Футболчилар ўзларини эркин тутишди. Биласизми, мен ҳам ўзим майдонда ҳаракат қилаётгандек сездим. Мана шундай ҳакамлик бўлса, Про-лига савияси янада ўсади. Дилшод Каримов бошчилигидаги ҳакамлар бригадасига ўз миннатдорлигимни билдираман.

Деярли 1 соат йигитлар бир киши кам бўлиб ўйнади. Биринчи бўлим охирларида бош ҳакам жамоамиз сардори Мурод Тўйчибоевга қизил карточка кўрсатди. Шундай бўлса-да, ирода кўрсата олдик. Биз ҳакамга эътироз билдирмадик, рефери ҳақ эди.

Хабарингиз бор, ўзбек футболидаги тажрибали мутахассисларидан бири Олег Тюлькин жамоамиздаги фаолиятини бошлади. Бундай малакали мураббийнинг биз билан иш олиб бориши жамоамизнинг келгуси фаолиятига ижобий таъсир ўтказиши шубҳасиз. Ёши кекса мухлислар унинг собиқ Иттифоқ чемпионатида тўп тепганини эслашади. Демоқчиманки, Олег Павлович билан ҳамфикрликда ишлаяпмиз. У кишининг маслаҳатлари бизга йўл келмоқда.

Фурсатдан фойдаланиб, жамоамизга ёрдам бераётган клуб раҳбариятига, Тошкент вилояти ва Юқоричирчиқ тумани ҳокимлиги мутасаддиларига ўз миннатдорлигимни билдираман. Келгусида ҳам уларнинг ишончини оқлашга интиламиз", - деди Холбоев.

Неъматжон Аҳмедов суҳбатлашди