Виталий Левченко: "Жокич ва Йовович касал. Кўплаб позицион ҳужумлар уюштирдик"

"Жуда кўп вазиятлардан фойдалана олмадик. Рақибимиз бугун ҳимояланди ва биз позицион ҳужумга ўтишга мажбур бўлдик. Танаффусга чиқишдан аввал гол ура олдик. Иккинчи бўлимда эса устунлигимизни давом эттирдик. Мухлисларни ғалаба билан табриклайман", - дея фикр билдирди Виталий Левченко бугунги баҳс ҳақида.

- Ўзгаришларни қандай факторларга асосланган ҳолда амалга оширдингиз? Ички ҳиссиётми ёки майдондаги ўйиндан келиб чиқиб?

- Кўпроқ таҳлил билан боғлиқ. Бизда кичик жароҳатланган футболчилар бор. Айрим футболчилар танаффусда захирага олинишини сўради. Кимдирни эса ўйиндан келиб чиқиб алмаштирдик. Захирадан майдонга тушган футболчилардан кўнглим тўлди. Биз темпни ушлаб қола олдик ва голлар урдик.

- Йован Жокич ва Владимир Йововичлар кўринмай қолди...

- Улар касал. Менга етиб келган маълумотларга кўра уларнинг қони қуюқлашиб кетибди. Шу ерда даволанишди ва кейин тикланиш учун ўз юртларига жўнаб кетишди. Футболчилар жамоага қайтганидан кейин ҳам, Суперлигада ўйнашга тайёр спорт ҳолатида бўлишмайди. Уларни биринчи давра якунига қадар майдонга қайтишмайди.

- Ҳужумчиларга вазиятларни якунлашда нима етишмаяпти? Совуққонликми ёки бошқа фактор...

- Одатда бундай саволларга маҳорат етишмаяпти дея жавоб беришади. Омад ҳам керак. Омад келмаса ҳам қийин. Совуққонлик, вазият ижроси ва бироз омад керак, холос. Шунда ҳужумчиларни имкониятлардан фойдалана олишади.

- Учинчи гол бурчак зарбасидан сўнг узоқ масофадан йўлланган зарба орқали киритилди. Футболчиларга сиз узоқдан зарба бериш ҳақида кўрсатма берган эдингизми?

- Биз машғулотларда стандартларни ишлаб борамиз. Рақиб ҳам бурчак зарбаларидан яхши фойдаланишини кўриб чиққан эдик. Йигитларга яхши ижро учун раҳмат.

- "Шўртан" дастлабки дақиқаларданоқ бир киши кам бўлиб қолди, лекин футболчиларингиз биринчи тайм давомида хотиржамликка берилиб ўйнади ва ҳисоб очилмади. Бунга нима сабаб бўлди?

- Аввалроқ айтиб ўтганимдек имкониятларимиз фойдаланишимиз керак эди. Биз кўплаб позицион ҳужумлар ташкил этдик, аммо футболда энг муҳими реализация. Биз ушбу йўналишда иш олиб борамиз ва вазиятни ўнглашга интиламиз.