Вақтинчалик ишсизлар: 7 нафар таниқли эркин агент

Трансфер ойнаси ёпиқ. Аммо, клубларда ҳали ҳам таркибни кучайтириш учун вариантлар бор. Бозорда ҳар қандай вақтда шартнома имзолаш мумкин бўлган эркин агентлар ўз соатларини кутишмоқда. Масалан, Диего Коста деярли "Вулверхэмптон"га ўтди. 

Аммо, улар орасида бошқа етарли даражада таниқли шахслар ҳам бор. Улар ҳақида ҳозир гаплашамиз. 7 нафар ҳозироқ шартнома имзолаш мумкин бўлган эркин агентлар.

Жейсон Денайер

Тажрибали ҳимоячилар ҳозирда юқори даражада қадрланади. Шу сабаб Денайернинг клубсиз қолиши ғалатироқ. 27 ёшли марказий ҳимоячи июлда "Лион"дан кетди ва шундан бери эркин агент мақомида юрибди. Бельгияликда юқори даражада ўйнаш бўйича катта тажриба бор. 

У "Сандерленд", "Селтик", "Галатасарой" ва "Лион"да ўйнашга улгурган ва 139та ўйинда 8та гол уришга эришган. Денайер — эркин агентлар ичида энг қиммати. У 14 миллион еврога баҳоланмоқда. Футболчига АПЛ ва А Сериядан қизиқиш бор, аммо у ҳали ҳам ишсиз юрибди.

Дан-Аксель Загаду

Клуб топа олмаётган яна бир таниқли ҳимоячи. Загаду июлда Дортмунднинг "Боруссия" клубидан кетди ва ҳали ҳам ишсиз юрибди. Ҳозиргача 23 ёшли марказий ҳимоячини ҳеч ким ҳеч бўлмаса ротацияга олмагани ҳам қизиқ. Француз ёш, аммо маълум тажрибага эга. 

У Бундеслигада 94та ўйинда майдонга тушган. Ўйинчига "Интер" ва "Рома"нинг қизиқиши хабар қилинди, аммо итальян клублари у билан шартнома имзолаш учун жиддий ҳаракат қилмади. Аммо, Симоне Инзаги Миланга яна бир ҳимоячини олиб келиш зарурлигини айтган эди.

Дэнни Роуз

Роузни инглиз футболи мухлислари яхши билишади. У Премьер-лигада 202та, Чемпионшипда эса 32та ўйинда майдонга тушди. 32 ёшли чап қанот ҳимоячи ижарада кўп юрди. У "Питерборо", "Бристоль", "Сандерленд", "Тоттенхэм" ва "Ньюкасл"да ўйнаган. Футболчининг сўнгги клуби "Уотфорд" бўлганди ва у жамоани эркин агент мақомида тарк этди. 

Роуз ҳеч қачон Англиядан ташқарида ўйнамаган, аммо Премьер-лигада унга ҳозирча катта қизиқиш йўқ. Тажрибали фулбекни Чемпионшипга таклиф қилишга тайёрлар, аммо у катта эҳтимол билан яхшироқ таклифни кутади.

Фабиан Делф

Англиянинг икки карра чемпиони ҳозирча ишсиз. Делф ҳам Роуз каби деярли бутун фаолиятини АПЛда ўтказган. 32 ёшли хавбекнинг сўнгги клуби "Эвертон" бўлган эди ва у Мерсисайд жамоасини июлда тарк этганди. У бунга қадар "Манчестер Сити", "Астон Вилла" ва "Лидс"да ўйнаган. 

Делф Премьер-лигада катта тажрибага эга, аммо ҳеч қайси клуб ҳозирча унга жиддий қизиқиш билдирмаяпти. Бу бошқа лигаларга ҳам таалуқли. Аммо, бу вақтинчалик бўлиши мумкин. Тажрибали ярим ҳимоячида албатта фаолиятини давом эттириш учун қизиқарли таклиф чиқиши керак.

Хатем Бен Арфа

Бен Араф тез-тез клубини ўзгартиради. Француз Лига 1, АПЛ ва Ла Лигада ўйнашга улгурди. 35 ёшли хавбекнинг сўнгги иш жойи "Лилль" бўлган эди, у ушбу жамоада ўтган мавсумнинг иккинчи қисмини ўтказди. Аммо, футболчининг у ердаги ишлари яхши кетмади. 

Кўп ҳам ўйнамаган Бен Арфа апрелда мураббий билан ҳам урушди. У 1 июлда эркин агентга айланди. Хатем катта эҳтимол билан таклифларни кутади, сабаби у фаолиятини якунлаш ҳақида маълум қилмади. Аммо, унга катта қизиқиш билдирилмаяпти.

Йосип Иличич

Иличич узоқ вақт "Аталанта" учун муҳим ўйинчи бўлди. Словенияликнинг бир мавсумда гол+пас тизимида 20дан ортиқ очко жамғарган пайтлари бўлди. Аммо, унинг ишлари сўнгги пайтларда пасайди. Якунда, томонлар хайрлашишга қарор қилишди. 34 ёшли хавбек ёзги трансфер ойнаси пайтида бергамоликларни тарк этди ва эркин агентга айланди. 

Иличичнинг шахсий муаммолар сабаб фаолиятини якунлаши мумкинлиги айтилди, аммо футболчи бу маълумотни рад этди. Словениялик ҳали бутсаларини михга илмоқчи эмас. Аммо, шу билан бирга унинг фаолиятини қаерда давом эттириши маълум эмас.

Энди Кэрролл

Кэрроллнинг шонли кунлари аллақачон ортда қолган кўринади. Аммо, бу унинг бошқа ҳеч кимга керак эмаслигини англатмайди. Энди — тажрибали форвард. У фаолиятини фақат Англияда ўтказди. 33 ёшли ҳужумчи "Ньюкасл", "Престон", "Ливерпуль", "Вест Хэм", "Рединг" ва "Вест Бромвич"да ўйнаган. 

Кэрролл июлдан бери эркин агент мақомида юрибди. Форвардда Англиянинг олий лигасида катта тажриба бор, аммо у Чемпионшипга боришга ҳам уялмайди. Бу йигитнинг фаолиятини якунлашига ҳали эрта, шу сабаби уни яна Англия майдонларида кутамиз.

Алишер Остонов таржимаси