Вали Султоновнинг фарзанди, "Бунёдкор" асосий таркибига киришга ҳаракат қилаётган Умид билан интервью

Championat.asia сайти мухбири "қалдирғочлар" ярим ҳимоячиси Умид Султонов билан суҳбатлашди.

- "Бунёдкор"га келишингиз қандай содир бўлган?
- "Бунёдкор"га 2015 йилда келганман. Дастлаб академияда таҳсил олдим, 16 ёшимда Виктор Карпенко мени ўринбосарлар жамоасига таклиф қилган. Ҳозир Шуҳрат Мақсудов жамоанинг асосий таркибига жалб қилди.

- Таниқли футболчи ва мураббий Вали Султоновнинг фарзандисиз. Футболчи бўлишингизда отангизнинг ҳиссаси катта бўлганми?
- Албатта, дадамга қизиқиб футболга кириб келганман. Ёшлигимда келажакда дадамдан ҳам кучли футболчи бўлишни ўз олдимга мақсад қилиб қўйганман.

- Кўпчилик сизни Жалолиддин Машариповга ўхшатишади. Сиз ҳам хоразмликсиз. Кўпчилик хоразмлик футболчилар Тошкентга келганида шева билан боғлиқ қийинчиликлар бўлишини эшитганмиз. Сизда қандай бўлган?
- Бошида келганимда шевам туфайли қийналганман, бошқа боллардан ажралиб юрардим. Кейин секин-секин ўрганиб кетганман.

- Барча футболчиларнинг лақаби бор. Сизда ҳам лақаб борми?
- Ўтган йил "Бунёдкор" асосий таркибида тушишни бошлаганимда ёши катта футболчилар ҳазиллашиб "гуруч" деб чақиришди. Шу-шу ҳозиргача шундай чақиришмоқда.