Вали Султонов: “Андижонга 11 нафар футболчи билан келишга мажбур бўлдик”

Ўйиндан кейин урганчликлар устози Вали Султонов ўз фикрлари билан ўртоқлашди.

- Ўйин ҳақида нима дейиш мумкин? Кеча тунда 1500 км йўл босиб, Андижонга етиб келгандик. Табиийки йигитларда чарчоқ аломатлари бор эди. Қолаверса бу ерга 11 нафар футболчи билан келишга мажбур бўлдик. Негаки, таркибда турли сабабларга кўра йўқотишлар мавжуд эди. Жарохатлар кўпайиб кетди. Хусусан асосий ҳужумчимиз Низомжон Норов бетоб бўлиб қолгани туфайли, жамоага ёрдам бера олмаяпти. Унинг йўқлиги жуда билиняпти. Лекин бу билан мағлубиятга баҳона қилмоқчи эмасман.

- Ўзингиз ҳам кузатдингиз, айрим футболчиларимиз жисмонан толиқиб қолди. Афсуски захирада ҳеч ким йўқ эди. Шунга қарамай йигитлар очко олиш мақсадида бор кучини бериб ўйнади.

- Андижонга 11 нафар футболчи билан келиб, ўйнаб кетишимизнинг боиси молиявий муаммолар билан боғлиқдир. Ғалаба билан қайтиш учун сафар ўйинига 1-2 кун олдинроқ бориб, жиддий тайёргарлик кўрсангиз шундагина мақсадга эришиш мумкин бўлади. Бироқ айни дамда бизда бундай имконият йўқ.

- Яшириб ўтирмоқчи эмасман, 2та ойлик ва 8та мукофот пуллари бўйича қарздорлик бор. Сафар ўйинларига имкон қадар бир амаллаб бориб келмоқдамиз. Агарда футболчига ойлик маошларини ўз вақтида бериб турсангиз, кейингина улардан натижа талаб қилиш осонлашади. Ҳозир бизда аксинча холат.

- Давралар оралиғида таркибда ўзгаришларга қўл урдик. Тажрибали футболчи Ренат Байрамовга ўзимиз жавоб бериб юбордик. У ўзидан кутилган нарсани кўрсатиб бера олмади. Шу боис ёшларга имконият беришга қарор қилдик.

- Таркибнинг ўзагини маҳаллий футболчилар ташкил этади. Шу боис ўйиндан бир кун йиғиламиз. Доимий тарзда машғулот ўтказиб, ишлаш учун эса шароит йўқ. Қолган вилоятлик футболчиларимиз эса асосан ўйин куни етиб келишади. Шунга қарамай жамоамизнинг турнир жадвалида эгаллаб турган ўрни қониқарли дейиш мумкин.

Исломбек Рустамбеков суҳбатлашди.