Вадим Абрамов: "Қўқон-1912"ни ўрнига "Локомотив" тушганда яхшироқ бўларди"

Қуръа натижаларига кўра Тошкентнинг "Бунёдкор" жамоаси  "Пахтакор", "Қўқон-1912", "Оқ-тепа" жамоалари билан "Д" гуруҳидан ўрин олди. Биз бу борада "Бунёдкор" бош мураббийи Вадим Абрамовнинг фикрлари билан қизиқдик. Қуръа унинг жамоаси учун қай даражада қийин ёки осон келди?

"Ўзбекистон кубоги гуруҳ босқичидаги рақибларимизни билиб олдик. Умуман олганда қизиқарли гуруҳдан жой олдик деб ўйлайман. Фақат, "Қўқон-1912" билан сафарда ўйнашимиз бироз ноқулайроқ бўлди. Йўлга ортиқча вақт сарфламасликни истагандик. Уларни ўрнига "Локомотив" тушганида бундан ҳам зўр бўларди. Барча ўйинлар Тошкентда ўтарди. "Пахтакор" ва "Оқ-тепа" билан ўйинлар қизиқарли кечиши шубҳасиз. 

"Пахтакор" билан тўқнашув? Билмадим, лекин менга "Пахтакор" билан ўйнаш ёқади. Жамоамиздаги ёш футболчилар учун катта тажриба вазифасини бажаради. Айнан кучли рақиблар билан ўйинлар орқали ўсишга эришишимиз мумкин. Ўша пайтга келиб биз қай даражада ўзгарганимизни кўриб оламиз. Умумий қилиб айтганда яхши рақиблар тушди",- дейди Вадим Абрамов.