Тунда уйқу йўқ! Италия кубоги финалини кўрамиз!

Бу йилги финалда ҳам ўтган йилгидек "Ювентус" ҳамда "Лацио" жамоалари тўқнаш келишади.

Италия кубоги финали аслида 2 июнь куни ўтказилиши керак эди. Аммо "Ювентус" жамоаси ЕЧЛ финалига йўл олгани муносабати билан Италия Кубоги финалининг санаси ўзгарди. Шу боисдан финал учрашуви кўпчилик кутганидек 2 июнь куни эмас, бугун бўлиб ўтади.

"Ювентус" жамоаси Италия кубогини қўлга киритиш (11) бўйича рекорчи саналади.
"Лацио" эса Италия кубогида 6 маротаба зафар қучган.
Аллегри келганидан кейин "Ювентус" кетма-кет икки йил Италия кубоги финалига чиқди ва ҳал қилувчи беллашувларда ғалабага қўлга киритди. Хусусан ўтган йилги баҳсда туринликлар айнан "Лацио"ни мағлубиятга учратиб бош совринга эга чиқишганди.

"Лацио" эса айнан ўтган йилги финал учун ҳам бугун реванш олишга уриниб кўради.
Римликлар 2013 йилдан буён "Ювентус"ни барча мусобақаларда мағлубиятга учратиш чораларини топа олишмаяпти. Сўнгги бор "Лацио" "Юве"ни айнан 2013 йили, Италия кубоги доирасидаги ўйинда таслим этганди.
Симеоне Инзаги қўл остидаги жамоа ушбу нохуш анъанани бузишга, ўз мухлислари қаршисида Италия кубогини қўлга киритишга бор кучларини сарф этишга ҳаракат қилишлари аниқ.
"Ювентус" учун жорий мавсум анча кўтаринки руҳда ўтмоқда. Жамоа барча мусобақаларда финишга қадар етиб келди. Қолган учта ўйин Аллегри шогирдлари учун ҳақиқий финалга айланади. Бугунги учрашувдаги ғалаба уларга Италия кубогини, кейинги "Кротоне"га қарши чемпионат доирасидаги баҳс чемпионликни, 3 июндаги финал эса ЕЧЛ кубогини тақдим этиши мумкин.
Бунинг учун эса "Юве" кучли ўйнаши ва кучларни тўғри тақсимлай олиш даркор. Аллегри учун ниҳоят муҳим палла яқинлашган. Таркибдаги муаммолар туфайли ҳам Аллегри бугун асосий футболчиларни қўйиб таваккалга қўл уролмайди.

Чунки олдинда Италия кубоги финалидан ҳам муҳимрок ўйин турибди. Лекин бу нарса "Ювентус"ни Италия кубоги учун курашмайди, финалга жиддий ёндошмайди, деган фикрни илгари суришдан йироқмиз. Европада фақат "Ювентус" "требл" қайд этиш имкониятига эга. Айнан мана шу жиҳатдан "Ювентус"ни финал олдидан руҳлантириши лозим.

"Лацио" Симоне Инзаги қўл остида ушбу мавсумда жуда ёрқин ўйин кўрсатмоқда. Жамоа ҳужумкор, эркин футбол ўйнашни хуш кўради.  Римликларнинг асосий "қуроллари" - Чиро Иммобиле ҳамда Кейта Бальде. Айнан мана шу икки ҳужумда ҳаракат қиладиган футболчиларга кўп нарса боғлиқ.

Римда, "Олимпико" стадионда ўтадиган финал мухлисларни асло зериктириб қўймаслиги аниқ.
Финални бошқариш тажрибали хуштак эгаси Паоло Тальявентога ишониб топширилган.

"Лацио" олтинчи кубок ва ўтган йилги финал учун ҳам реванш олиш учун бугун "Ювентус"ни ранжитишга ҳаракат қилади.
"Юве" эса ушбу мавсумдаги дастлабки совринни қўлга киритиш, муҳим учрашувлар олдидан жамоа кайфиятини тушириб юбормаслик учун ҳам бу финалга янада кўпроқ урғу бериши лозим бўлади.

Қайси жамоа ғолиб бўлишини тахмин қилиш бирмунча қийин. Аммо шуниси аниқки, бугунги финалдан мухлислар аниқ ютишади. Айниқса нейтрал мухлислар, чиройли ва шиддаткор футбол шайдолари учун Римдаги финал яхши туҳфага айланади.