Тожибоев ва Холмуродов Ғузорга келишди

Қаршида, “Насаф” футбол Академияси сунъий қопламали майдонида ўтган баҳсда 1:1 ҳисоби қайд этилди. Ғузорликлар томонидан киритилган голга Ботир Қодирқулов муаллифлик қилди. Шу куни машғулотларга келиб қўшилган Элдор Тожибоев, гарчи жамоадошлари билан бирга бўлса-да, майдонга туширилмади. Эслатиб ўтиш жоиз, бу тажрибали дарвозабон ўтган мавсумнинг иккинчи даврасини “Шўртан” сафида ўтказган эди. Тожибоев янги мавсумни ҳам ғузорликлар билан бошлаш ниятида эканлигини маълум қилди.   

Шунингдек, ўз вақтида “Шўртан” таркибида фаолият кўрсатган ҳимоячи Фахриддин Холмуродов ҳам “Оқ бўрилар” машғулотларига келиб қўшилган. Тожибоевдан фарқли равишда, у биринчи куннинг ўзидаёқ майдонга тушишга улгурди.

Энди Мухтор Қурбонов шогирдлари 20 январь куни Ғузорда “Машъал” жамоасига қарши яна бир синов-назорат учрашувини ўтказишади ва қисқа муддатли танаффусга чиқишади. Кейинги босқич тайёргарликлари пойтахтга кўчади.

“Насаф” – “Шўртан” – 1:1.
“Шўртан”: Р.Абдулов (Ж.Каримов, 72), З.Раупов (Э.Тоғаев, 61), Ж.Отақулов (Б.Тўраев, 61), А.Алиқулов (Э.Интизомов, 46), У.Эшмуродов (Д.Донаев, 46, Ф.Холмуродов, 70), М.Маҳмудов (Р.Абдувоҳидов, 50), А.Востриков (Ш.Хурсанов, 46), Д.Камолов (Ғ.Раҳмонов, 46), А.Бабаев (О.Каримов, 40, Т.Нуруллаев, 78), Б.Қодирқулов (А.Арслонов, 46), И.Каримов (С.Тўрақулов, 50).