Титанлар тўқнашувида камбек кўрамизми?

Интрига максимал, фаворит йўқ ва якунда ҳар нарса бўлиши мумкин бўлган баҳс, қисқа қилиб айтганда катта болаларнинг катта ўйини. Тунда “Аллианс арена”га кимнинг кўз ёшлари тўкилади? Саволга жавобни бир неча соатлардан сўнг билиб оламиз.

Эҳтимолий истеъфо.

Баҳс натижаси икки томон учун ҳам ўта аҳамиятли. Мураббийларнинг курсиси қимирлаб қолганига анча бўлган. «Бавария» ҳам ПСЖ ҳам ички чемпионатда муаммоларга учраяпти. Баҳс натижаси қандай бўлиши эътибори билан ўйиндан сўнг истеъфо бўлиб қолиши ҳам мумкин. Галтенинг қулоғи қизишни бошлади. Яна бир фактор якунда қайсидир томон плей-оффнинг илк раундида юришини тўхтатади, бу эса раҳбарият ва мухлислар томонидан осон ҳазм қилинмайди.

Қирол ва шаҳзоданинг кейинги тақдири.

Париж етакчиларининг жамоада қолиши шу ўйинга боғлиқ. Мессининг шартнома муддати якунланмоқда, футболчининг ПСЖдан кетиши, янги шартнома тузилмаслиги ҳақида миш-мишлар юрибди. Агар, агарларнинг ичида “жамоа Чемпионлар Лигасини тарк этса” деган жойи ҳам бор. Килиан билан ҳам шунга ўхшаш вазият. Мбаппенинг раҳбарият билан келишувида титуллар банди ҳам борлигига ишончим комил. Хусусан кўҳна қитъанинг энг нуфузли мусобақаси бўйича алоҳида қисмлар бор бўлса керак (катта эҳтимол). Сўнгги пайтларда ОАВда французнинг «Реал»га ўтиши борасидаги хабарларда ҳам ҳақиқат борлиги кўриниб турибди (Переснинг нимтабассумини эслаймиз).

Тахминий ўйин картинаси.

Илк учрашувни ёдга оламиз. Парижда немислар 70 дақиқа доминантлик қилишганди (Мбаппе ўйинга тушкунига қадар) кейин шаҳзода жангга ташлангач кучлар тенглашганди. Мбаппе бу сафар ўйинни асосий таркибда бошласа бошқачароқ ўйинга гувоҳ бўламиз (бу ҳақда пастроқда батафсил). Биласиз УЭФА сафардаги гол қийматини бекор қилган, шу фактор мезбонларни хотиржамликка чорласа не ажаб. Галте илк баҳсдан фарқли бу сафар ҳужумкор ўйин услубини танласа керак (бунга мажбур). Бошқа томондан «Бавария» мухлислар кўз ўнгида ҳимояда ётишга ҳаққи йўқ. тахминимча ўйин бўлак-бўлакларга бўлиниб кетади. Устунлик томонлар ўртасида алмашиниб туради. Катта ўйинлар тақдирини кичик эпизодлар ҳал қилиб келган.

Мбаппе фактори.

Килиан айни пайтда дунёда исталган ҳимоя қўрғонини парчалай оладиган ягона футболчи. Мбаппе жамоаси чўкиб, ҳеч нима ўхшамаётган пайтларда рақибга бир ўзи қарши тура оладиган йигит. ЖЧ финали ва Чемпионлар Лигаси ўткан мавсумида “Реал Мадрид”га қарши ўйинлар бунга ёрқин далил. Нагелсман французга қарши персонал тайинлаши ҳам мумкин, аммо осон бўлмайди.

Статистика.

Жамоалар бунга қадар йирик турнирларда 12 бор тўқнаш келишган. Қизиғи, бирор марта дуранг қайд этилмаган. Ғалабалар бўйича мутлақ тенглик, жамоалар ҳисобида 6 тадан ғалаба бор. Сўнгги  5 тўқнашувнинг 4 тасида «Бавария» зафар қучган бўлса ва фақат 1 маротаба французларнинг қўли баланд келган. Рақамлардан кўриниб турибдики, «Бавария» ПСЖ учун ноқулай рақиб.

Йўқотишлар.

Мезбонлардан Нойер (жароҳат), Лукас Эрнандес (жароҳат) ва Бенжамин Павар (дисквалификация) ўтказиб юборади. ПСЖдан Неймар, Кимпембе, Ренато Санчес жароҳат сабаб ўйинда иштирок эта олишмайди. Ашраф Ҳакими, Маркинёс ва Мукиеле сўроқ остида (футболчиларда кичик жароҳат бор). Ўйлашимча, Неймарнинг йўқлиги бу сафар ПСЖ зарарига ишламайди.

Тахминий таркиблар.

Ўйинни италиялик рефере Даниел Орсато бошқариб боради. Баҳс тунги 01:00 да бошланади.

Жалолиддин Халилов