Тачмурод Агамуродов: «Динамо»нинг натижасини яхшилаш учун бор билим ва тажрибамни ишга соламан»

Тайёргарлик машқлари якунлангач, янги мутахассиснинг фикрлари билан қизиқдик.

«Самарқанддек шаҳар жамоасида яна иш бошлаганимдан жуда хурсандман. Бу ажойиб шаҳардаги дастлабки фаолиятимдан менда жуда яхши ва ёрқин хотиралар қолган. Клуб мен учун бегона эмас – бир қатор футболчилар билан олдин ҳам ишлаганман» - дейди мураббий.

«Албатта, ҳозирда жамоанинг турнир жадвалидаги ҳолати ҳавас қиларли даражада эмас. Аммо, иккинчи давранинг асосий ўйинлари ҳали олдинда ва вазиятни ўзгартириш учун имконият бор. Шундай экан, мен жамоа натижалари яхшиланиши учун бор билим ва тажриба ҳамда маҳоратимни ишга соламан. Тажрибамдан биламан – «Динамо»нинг минглаб содиқ мухлислари борки, улар ҳеч қачон севимли жамоалари тақдирига бефарқ бўлмайдилар. Умид қиламанки, улар ўз жамоаларини қўллаб-қувватлашда давом этишади ва биз бирга яхши натижалар учун курашамиз» - дея таъкидлади Тачмурод Шамакович.

Эслатиб ўтамиз, «Динамо» навбатдаги 17-турда шанба куни сафарда «Бунёдкор» меҳмони бўлса, 18-турда чоршанба куни «Андижон»ни ўз майдонида қабул қилади.