“Supermokh Cup 2016”. 7-кун. “Бунёдкор” “Сан-Пауло”га ютқазиб қўйди ва 4-ўринни эгаллади

Бугун куннинг биринчи ярмида U-14 ёш тоифасида “Бунёдкор” тарбияланувчилари Бразилиянинг “Сан Пауло” жамоаси вакиллари билан учинчи ўрин учун куч синашишди. Учрашув қизиқарли курашларга бой бўлди. Лотин Америкаси вакиллари жисмоний ва техник жиҳатдан бироз устунлик қилишди ва яратган вазиятларни голга айлантиришда аниқ ҳаракат қилишди. Бунинг натижасида “Сан-Пауло” 3:0 ҳисобида ғалаба қозонди. Шу тариқа, Сергей Чигодаев ва Акмал Рисқуллаев бошчилигидаги 2002 йилда туғилган футболчилардан иборат жамоамиз 20та жамоа иштирок этган турнирда 4-ўринни эгаллади ва кичик бронза медаллари билан тақдирланадиган бўлди. Куннинг иккинчи ярмида бўлиб ўтадиган финал баҳсида Португалиянинг “Лиссабон” футбол мактаби тарбияланувчилари маҳаллий Малайзия пумалари жамоаси билан беллашади.

2004 йилда таваллуд топган жамоамиз эса бугун Бруней қироллигининг “Табуан” клуби билан куч синашди ва йирик 4:1 ҳисобида ғалаба қозонди. Жамоамиз голларига Миркамол Абдураззоқов (2та), Шаҳзодбек Акбаралиев ва Акобиржон Аҳмаджонов муаллифлик қилишди. Шу тариқа, Миркамол Қосимов ва Темур Бобохонов бошчилигидаги U-12 жамоамиз турнирни ғалаба билан якунлади.