Суперлига старти олдидан. Бахтиёр Ашурматов: "Чемпионлик учун кураш 3 та жамоа ўртасида кечади, бу йил қизиқарли Суперлига кўрамиз"

Жамоалар ўтган вақт давомида янги мавсумга муносиб тайёргарлик олиб боришди, ҳар ким ўз имкониятидан келиб чиқиб таркибни шакллантирди. Янги номларни қўшиб олди. Мақсадлар эса улкан. ОКМК - "Бухоро" учрашуви билан бошланадиган дастлабки тур олдидан тажрибали мураббий Бахтиёр Ашурматовнинг фикрлари билан қизиқдик. 

"Мухлислар кутган чемпионатимиз ҳам бошланмоқда. Бу йилги мавсум қизиқарли ўтиши кутилмоқда, чунки жамоалар сони аввалгидан кўпайди. Суперлигада қолиш учун курашувчан жамоалар сони ошди. Фикримча, чемпионлик учун "Нефтчи", "Пахтакор" ва "Насаф" кураш олиб боради. "Навбаҳор", ОКМК бу жамоаларга бош оғриқ бўлиши мумкин. Лекин айтганимдек олтин медалларга ҳаракат 3 та жамоа ўртасида кечишини кутяпман. 

1-тур учрашувларига келсак, иккита "Бунёдкор" - "Нефтчи", "Насаф" - "Сўғдиёна" учрашувлари қизиқарли ва муросасиз кечишини айта оламан. Қолган учрашувларда майдон эгаларининг имкониятлари кўпроқ. ОКМК, "Пахтакор", "Навбаҳор" ўз майдонидаги ўйинларни ғалаба билан бошлашини тахмин қиламан. "Қўқон-1912" - "Андижон" водий дербисида қўқонликларда ғалаба учун имконият кўпроқ. Бу йил Қўқонга Суперлигада омад тилайман. "Қизилқум" - "Сурхон", "Хоразм" - "Шўртан" учрашувларида имконият тенг. Чемпионат чиройли ўтишини ва ҳамма жамоаларга омад ёр бўлишини тилаб қоламан",- дейди Бахтиёр Ашурматов.