Суперлига битта шаҳарда давом этадими, ўйинларга ОАВ киритиладими, ПРО-лига қандай бўлади? Диёр Имомхўжаев билан эксклюзив суҳбат

Шу муносабат билан ПФЛ бош директори вазифасини бажарувчи Диёр Имомхўжаевга ўзимизни қизиқтирган саволлар билан мурожаат қилдик.

- Суперлига уй сафар тизимида давом этадими?
- Биз ишлаб чиққан режага кўра Суперлига учрашувлари уй-сафар тизимида давом эттирилади.

- Суперлига ўййинларини ёритишни истаган ОАВ ўинларга киритиладими?
- ОАВ ҳақида ҳам ўйлаганмиз. Уларга ҳам карантин қоидалари тақдим этилади, протоколга тўлиқ амал қилинади. Қайси жойдан кирилади, қайси жойдан чиқишади барчаси тартибли бўлади. Шу талабларга амал қиладиган ОАВ вакиллари ўйинларга киритилади.

- Бешта ўзгаришга рухсат бериладими?
- Бешта ўзгаришга рухсат берилади, лекин 3та имкониятда. Яъни бир жамоа ўйин давомида 3 марта ўзгариш учун пауза олади. Таймлар орасида ҳам футболчини алмаштириш мумкин. Шуни таъкидлаш лозимки, 5 футболчини ўзгартириш имконияти биринчи давра якуни, 13-турга қадар рухсат берилади.

- Суперлига баҳслари бошлангач, худо кўрсатмасин қайсидир футболчи ёки мураббийдан вирус чиқса бутун жамоа карантинга олинадими?
- Бу саволга жавобни аниқ билмайман. Лекин катта эҳтимол билан шундай бўлади. Бу нарсани Санитария-эпидемиологик осойишталик агентлиги билан биргаликда ҳал қилишимиз керак. Айни пайтда Навоийда хизмат сафаридамиз, Тошкентга қайтганимиздан кейин улар билан учрашиб, барчасини келишиб оламиз.

- Тўрт даврадан иборат ПРО-лига тақдири нима бўлади?
- Хабарингиз бор, 2020 йилги ПРО-лига ҳали бошланмаган. Шу боис ушбу лига клублари бош мураббийлари билан гаплашиб, форматини ўзгартирамиз ва чемпионат баҳслари қачон старт олишини алоҳида эълон қиламиз.

Нарзулла Сайдуллаев суҳбатлашди