Суперкубок-2022. Славче Войнески: "Мавсум якунида ҳам совринларни қўлга киритган ҳолда матбуот анжуманига киришни истайман"

Унга ўйиннинг энг яхши футболчиси Драган Черан ҳамроҳлик қилди.

"Учрашув жуда қийин бўлди. Жуда шаклланган жамоага қарши ўйнадик. Биринчи навбатда жамоа аъзоларига раҳмат айтаман. Улар майдонда бор маҳоратларини ишга солишга ҳаракат қилишди. "Насаф"га қарши ўйнаш осон бўлмади, биринчи бўлимда рақиб футболчиларига имкон берган ҳолда ўйнадик. Иккинчи таймда эса тўп назоратини ўз томонимизга оғдирган ҳолда ғалабага эришдик. Суперкубокни қўлга киритдик ва бундан буён хотиржам бўлишимиз керак эмас. Мавсум якунида ҳам совринни қўлга киритган ҳолда матбуот анжуманида қатнашишни истайман", - деди Славче Войнески.

"Жуда принципиал ўйин бўлди. Кубок финалидаги мағлубият учун реванш олишимиз керак эди. Мавсумни яхши бошладик. Ҳозир кўзимизни очамиз ва уч кундан кейин Самарқандда яна бир қийин ўйин кутиб турибди. Яна бир бор чемпионликни қўлга киритмоқчимиз", - деди Драган Черан.

- Суюновнинг ҳолати қандай?
- У тизза қисмидан жароҳат олди. 24 соат ичида унинг ҳолати ҳақида тўлиқ маълумот оламиз. Элдорнинг айтишича бу жойидан олдин ҳам жароҳат олган экан.

- Черан барибир ҳужумчи ортида ўйнайдиган ўйинчи. Мавсум давомида у ҳужумда ўйнайдими? Ёки Миржаҳон Мираҳмадовга ҳам имкон бериладими?
- Мавсум узоқ давом этади. Шу боис барча футболчиларга имкон берамиз, шу жумладан Мираҳмадовга ҳам. Соф ҳужумчи сифатида ўйнаш ёки ҳужумчи ортида ўйнаш эса футболчининг ўзига боғлиқ.

- Мураббий сифатида олдин ҳам соврин ютганмисиз?
- Туркияда ҳам соврин ютганман, аммо Суперкубокни илк бор ютдим.

- "Пахтакор"даги илк матбуот анжуманида сиз 100 фоиз ҳужумкор ўйнаймиз дегандингиз. Бугун "Пахтакор" қанчалик ҳужумкор ўйнади деб ўйлайсиз?
- Биринчи галда ҳужумкор ўйин деган нарсага ойдинлик киритиб олишимиз керак бўлади. Бу 90 дақиқа давомида ҳужумда ўйнаш эмас керак пайтда ҳужумга ўтиш ва ўша ҳужумдан натижа чиқариш дегани.

- Уч йилдан буён Суперлигада тўпурар бўлаяпсиз. Бу йил нечта гол уришни мақсад қилгансиз?
Драган Черан: - Аниқ бир рақамни айта олмайман, футбол жамоавий ўйин. Шу боис қанча гол урсам ҳам жамоамга фойда келтирсам бўлгани. "Пахтакор" - иккинчи уйим. Бошқа жамоага ўтиш ҳақида умуман ўйламаганман.