"Суонси" Фабианскининг қизил карточкасига апелляция берди

Польшалик посбон "Вест Хэм"га қарши ўйиннинг 68-дақиқасида майдондан четлатилди. Учрашувда "Суонси" 1:3 ҳисобида мағлуб бўлди. Лукаш жарима майдони ташқарисида рақиб ҳужумчиси Диафра Сакони қўли билан ушлаб тўхтатиб қолди.

Учрашувдан сўнг "Суонси" устози Гарри Монк қизил карточка ноҳақ берилганини айтиб ўтди. Бугун Уэльс клуби бош ҳакам Крис Фойнинг қарорига нисбатан апелляция берди.

"Қизил карточка берилган вазиятга эътибор қилинг. Рақиб футболчиси тўпни қўли билан ўйнади. Эшли (Уильямс) хато қилди лекин рақиб тўпни қўли билан ўйнагани учун ўйин тўхтатилиши керак эди. Бундан ташқари ўша вазият яққол голли вазият эмасди", - дейди Монк Daily Mail нашрига.