Суҳроб Бердиев: “Темурхўжа Абдухолиқов йил футболчиси, Рўзиқул Бердиев йил мураббийи бўлса керак”

Айрим клубларимиз мавсумга тайёргарликни 15 декабрдан бошласа қолган жамоалар 20 декабрда машғулотларга киришади.

“Бу йилги чемпионат мен учун бир текисда ўтмади. Биринчи даврада “Пахтакор” жамоасида ҳаракат қилдим. “Шерлар” таркибидан кетганимнинг ҳам ўзига яраша айрим сабаблари бор. “Пахтакор”га келганимда жамоа футболчилари мени яхши кутиб олишди. “Пахтакор” клубида ўз ўйинимни топа олмадим, деб ўйлайман. Уларнинг ўйин услубига мослаша олмадим.

Шунинг учун ҳам иккинчи даврада “Қўқон-1912” жамоасига кўчиб ўтдим. У ерга мени Нўъмон Ҳасанов чақирди. Чунки ушбу мураббий мени қандай кучга эга эканлигимни билар экан. Иккинчи даврада “Қўқон-1912” клубиига Нўъмон  Ҳасанов келганидан сўнг жамоанинг ўйини яхши томонга ўзгара бошлади. Янги футболчилар жалб қилинди. Сербиядан иккита легионер футболчи клубга таклиф этилди.

Бу йилги чемпионатимиз анча қизиқарли тарзда ўтди. Йил футболчисини алоҳида ажратиб кўрсатиш қийин. Менимча йил футболчисига “Локомотив” клубидан Темурхўжа Абдухолиқов, “Пахтакор”дан Жалолиддин Машарипов ва “Бухоро” жамоасидан Шавкат Саломов йил футболчиси номига сазовор, деб ўйлайман.

Мураббийларга келадиган бўлсак, “Насаф”дан Рўзиқул Бердиев, “Бухоро”дан Жамшид Саидов ва “Қўқон-1912” клубидан Нўъмон Ҳасанов йилнинг энг яхши мураббийлари, бўлса керак", - дейди Суҳроб Бердиев.

Жаҳонгир Сотволдиев