Станислав Черчесов: "Германиянинг тезлигига бардош беролмадик"

- "Биринчи бўлимда биз немисларнинг тезлигига бардош беролмадик. Ўйиндан аввал ҳам футболчиларга рақибнинг тезлига тайёр туришимиз лозимлигини уқтиргандик. Учрашувдан кейин ҳам кийиниш хонасида бу ҳақда гаплашдик. Айнан шу нарса бизга панд берди.

Германия баҳсни жуда агрессив руҳда бошлади. Охирги ўйинлардаги муваффақиятсизликлар уларни ғазаблантиргани шундоқ кўриниб турди. Биз ўйинни жуда ёмон бошладик демаган бўлардим. Аммо ҳаддан ташқари хотиржамликка берилганимиз сезилиб қолди.

Германия таклиф этган тезликка бардош беролмаганимиз уларга устунлик тақдим этди.

Танаффусда кийиниш хонасида ҳеч кимга бақирганим йўқ. Чунки бунга ҳожат ҳам йўқ эди. Таблодаги ҳисобдан футболчиларнинг ўзлари ҳам тегишли хулоса чиқариб, биринчи таймни ёмон ўтказишганини сезиб туришганди. Шу боисдан ҳам бу ерда ортиқча гапга ҳожат қолмаганди. Бу вазиятда танқид эмас, балки қандай қилиб яхши ўйнаш кераклигини тушунтириш лозим".