Шуҳрат Файзиев: "Бу майдонда комбинацион ўйин кўрсатиш қийин"

Ўйин ҳақида

Андижонда қийин ўйин бўлишини кутгандик. Жамоамизда муаммолар кўп. Митрович ва Жўрабеков дисквалификацияга учраган бўлса, айрим футболчилар касал бўлиб қолишган. Бундан ташқари, бош мураббийимиз ҳам бироз бетоб.

Йигитлар охиригача ўйнаганликлари учун раҳмат дейман.

Майдон ҳолати унчалик яхши эмас, бу майдонда комбинацион ўйин кўрсатиш қийин ва узун паслар билан ўйнашга тўғри келади.

Майдон яхши эмас деб ҳисоблайсизми?

Ҳа, нотекис жойлари кўп. Ерлатиб ўйнаш қийин, шу боис узун паслар билан ўйнашга тўғри келяпти.

"Андижон"нинг ўйинини қандай баҳолайсиз?

Ҳамидуллаев келгач, жамоа ижобий томонга ўзгарган. Улар охирги ўйинларда 5 очкога эга бўлишди. Бекободда ва Наманганда яхши ўйин кўрсатишди. Шунингдек, "Бухоро"ни ютишди.

Ҳакамлардан кўпчилик норози бўлди. Шу бўйича нима дейсиз?

Бу менинг ваколатимга кирмайди. Буни махсус қўмита муҳокама қилиб, кўриб чиқиши мумкин.

Натижадан қониқдингизми?

Қийналиб бўлса-да, очко олдик. Ёки ютиб кетишимиз ҳам мумкин эди, яхши вазиятлар бизда ҳам, "Андижон"да ҳам бўлди.

Жамшид Болтабоев биринчи бўлимда майдон марказида тўп тепди, иккинчи бўлимда қанот ҳимоясига ўтказилди. Бунга нима сабаб бўлди?

Айтиб ўтганимдек, бунга сабаблар кўп. Шунақа қилишга тўғри келди. Захирадан кўриб турганингиздек, ёш йигитлар жой олишган.

Улуғбек Бақоевнинг ҳолати қандай?

Унинг ҳолати яхшиланмоқда. Ўйлайманки, у "Пахтакор" билан ўйингача қайтади.