Шота Арвеладзе расман лавозимини тарк этди ва шундай деди: "Пахтакор"дан кетяпман, лекин жамоа мухлиси бўлиб қоламан"

Қўйилган постда шундай дейилади: "Уч йил ўтди. Бугун мен "Пахтакор" бош мураббийлигидан кетдим. Ўтказилган ажойиб, муваффақиятли, чиройли ва қизиқарли 3 йил ўтди. Мухлисларга, жамоага, футболчиларга, бошқа бизни қўллаб-қувватлаб келган барчага миннатдорчилик билдираман. Бобур Шодиев, Улуғбек Муҳамедов, Дмитрий Адисман ва "Пахтакор"га жамоани бошқариш имкониятини тақдим этишгани учун алоҳида ташаккур айтаман. Жамоага ёшларни жалб этишга интилдик, ўйин услубини ўзгартирдик. Клубга келажакда ҳам муваффақиятли одимини давом эттиришини ва доимо кучли бўлиб қолишини тилайман. Мен энди жамоа бош мураббийи эмасман, лекин доимо "Пахтакор" мухлиси бўлиб қоламан. Фаолиятимдаги ушбу саҳифа менга катта тажриба берди ва Ўзбекистондаги ҳаётим ажойиб тарзда ўтди. Биз жуда зўр жамоа бўлдик ва мен буни ҳеч қачон унутмайман", деб ёзади хайрлашув мактубини Арвеладзе.

Шу ўринда сайтимиз орқали Шота Арвеладзени "Пахтакор"дан кетаётгани ҳақида кеча хабар бергандик. "Championat.asia" маълумотларига кўра, Шота Арвеладзенинг олдида Осиё ва Европадан қатор таклифлар мавжуд. Хусусан Хитой, Қатар, БАА ва Туркия клублари Арвеладзенинг хизматига қизиқиш билдирмоқда. Грузиялик мутахассис айнан қайси жамоа таклифини кўриб чиқиши ва кимнинг фойдасига қарор чиқариши номаълум.

"Пахтакор"дан кетиши эса мазкур таклифлар туфайли юз келмаганлиги айтилмоқда. Зеро Арвеладзенинг олдида доимо таклифлар бўлган ва грузиялик мутахассис ҳар гал "Пахтакор"да қолишни афзал билганди.

Шота Арвеладзе "Пахтакор"га ёзган мактубида айнан нима учун жамоада қолмагани ҳақида тўхталмаган.