Шаҳзод Нурматов: "Мавсум давомида кўп омадсиз ўйинлар ўтказганимизга қарамай Суперлигада қолишни уддаладик"

Албатта ушбу кўрсаткич аввалги йилларга қараганда анча паст ҳисобланади. Боиси барчамиз бу жамоанинг ўта ўринларда кўришга одатланганмиз. Лекин мавсум сўнггидаги қалтис вазиятни ҳисобга олганда жамоа кучлилар сафида қолишни уддасидан чиқа олди. Биз билан суҳбатда бўлган ҳужумчи Шаҳзод Нурматов бу борада қуйидагича фикрларни билдирди. 

- "Металлург" учун мавсум қандай ўтди? Қониқарсиз десак жамоа лигада қолишни уддасидан чиқди, қониқарли десак, жамоа эгаллаган ўрни ўзига мос эмас...

- Жуда қийин мавсум ўтказдик. Йил давомида кўп омадсиз ўйинлар ўтказган бўлсакда, охирида Суперлигада қолиш вазифасини бажардик. Охирги иккита ўйиндаги ғалабалардан сўнг барча хурсанд бўлди. 

- Сўнгги учта ўйинда жамоа тартибли ҳаракат қилди ва натижа кўрсата олди. Ноябрь ойидаги ФИФА кунлари кунлари юзага келди. Қайсидир маънода танаффус жамоа учун вақтинча қўниш вазифасини бажариб, футболчилар ўзига келиб олишига ёрдам бердими?

- Шундай десак ҳам бўлади. Тикланиб олишимиз учун ёрдам берди. Шунингдек испаниялик мураббий Луисма Эрнандеснинг ҳам хизмати катта. Ички муҳитни яхшилашга эришди, дея оламан. 

- Александр Лобанов, Камолиддин Тожиев каби футболчилар сўнгги турларда сафга қайтди. Бундай масъулияти катта ўйинда лидерлар кўп нарсани ҳал қилади...

- Уларнинг сафимизга қайтгани жамоанинг руҳини кўтарди. Бу фикрга қўшиламан. Қийин пайтда тажриба барибир ўз сўзини айтади. Етакчиларнинг ўрни катта, деб ўйлайман. Лекин ёшларсиз ҳам вазифасини бажара олмасдик. Чунки майдонда 11 киши ўйнайди. 

- "Металлург" сиз учун қадрдон жамоа ҳисобланади. Шу клуб орқали мухлисларга танилгансиз. Лекин сиз ўйнаган пайтдаги билан солиштирганда ўзгаришлар кўп. Бу сизда қандай фикрларни уйғотди?

- Мазкур жамоада ўзимни жуда яхши ҳис қиламан. Мухлислари ҳам ўзгача. Мен учун қадрдон жамоа бўлиб қолган. Кўп нарсалар ўзгарган. Жамоа базаси яхшиланган. Академия ишга туширилди. Кўп ўзгаришларга қўл урилган. 

- Мавсум бошида чемпионат қандай ўтишини тахмин қилган эдингиз? 

- Бошқа жамоаларнинг қайси ўринларни эгаллашларини тахмин қилмаганман. Лекин "Металлург" мавсумни тепа ўринларда тугатишини тахмин қилгандим.

Абдулазиз Искандаров суҳбатлашди