Саудия Арабистонининг иккинчи таркиби Парагвай билан дуранг ўйнади

Жаҳон чемпионати саралаш босқичида биз билан бир гуруҳда кураш олиб бораётган Саудия Арабистони 19 ноябрь куни дам олгани боис фурсатдан фойдаланиб ўртоқлик учрашуви ўтказди. 

Саудияликлар Ар Риёд шаҳрида Жанубий Америка қитъаси вакили Парагвай билан ўзаро куч синашишди. Ўзига яраша қизиқарли кечган баҳсда ҳисоб очилмади. Шуни айтиш лозим, бу ўйинда Саудия Арабистони бош мураббийи Эрве Ренар асосан иккинчи таркибни синаб кўрди. 

Чунки Ўзбекистон билан ўйиндан кейин "Ал Ҳилол"нинг барча футболчилари клуб ихтиёрига жўнаб кетишди. "Ал Ҳилол" айни пайтда Японияда бўлиб турибди ва 24 ноябрь куни "Урава Редс"га қарши ОЧЛ финал иккинчи учрашувни ўтказади. 

Парагвай билан баҳсда саудияликлар таркиби қуйидагича бўлди: 

Дарвозабон - Фаваз Ал Қарни; ҳимоячилар - Абдулраҳмон Ал Обайд, Ҳассан Ал Тамбакти, Муҳаммад Ал Хабрани, Султон Ал Ғанам; ярим ҳимоячилар - Абдулазиз Ал Биши, Абдулраҳмон Ал Довсари, Абдулелаҳ Ал Малки, Яҳё Ал Шеҳри, Фирас Ал Биракан; ҳужумчи - Абдуллоҳ Ал Ҳамдан.

Захирадан тушганлар: Сауд Абдулҳамид, Турки Ал Аммар, Харун Камара, Абдулмажид Ал Сват, Мухтор Али, Али Алавжами.