Самвел Бабаян: "Жамоа икки футболчига боғланиб қолмаган"

"Ўйлашимча иккала жамоа мухлислари чиройли ўйин гувоҳига айланишди. Футболда ҳимоядаги қўпол хатолар бўлиб туради. "Локомотив"ни ғалаба билан табриклайман. Ғалаба учун иккита етакчимиз етишмади. Улар ҳужум ташкил қилишда анча фойдали ўйнар эдилар. Чемпионат ўйинида омадимиз келмади, балки бошқа мусобақаларда омадимиз келар", - дейди Самвел Бабаян.

- Жамоани ОЧЛда қийин ўйин кутиб турибди. Футболчилар ўша баҳсга тиклана олишадими?

- Албатта, йигитлар ҳозирдан тикланишни бошлашди. ОЧЛда яхши ўйнаяпмиз, Искандеров ва Махарадзе йўқ бўлса ҳам яхши ўйнай олишимизни кўрдик. Умид қиламизки сўнгги турда ғалаба қозонамиз.

- Жавоҳир Соҳибов ҳақида фикрларингиз...

- У таянч ярим ҳимоясида яхши ўйнамоқда. Аммо ижодкорлик етишмаяпти.

- Ҳимоя марказидаги хатолар яна такрорланмоқда. Янги футболчи сотиб олиш режада йўқми?

- Ораховацни йил бошида сотиб олганмиз. У ҳаракат қилмоқда. Камолиддин Тожиев жароҳат олгани бизни панд берди. У тез орада сафга қайтади.

- Ўзбекистон чемпиони фақат иккита футболчига боғлиқми?

- Йўқ, уларсиз учинчи ўйинимизни ўтказдик. Очиқчасига айтсак бугун "Локомотив"дан кучсиз эмасдик. Омадимиз келмади.

- Наврўз Алимов "Пахтакор"га ўтганида яхши ўйнаб кетади деб ўйлагандик. Унинг кейинги тақдири қандай кечади?

- У яхши ҳужуми, келажаги порлоқ. Меҳнат қилишда давом этиши керак. "Қизилқум" сафида бизга қарши ўйнаганида тайёр футболчи деб ўйлагандик. Бироқ кўриндики ҳали бизнинг даражамизда эмас. Буни ўзи яхши тушуниб турибди, ўз устида тинмай меҳнат қилмоқда.

Нарзулла Сайдуллаев