Самвел Бабаян: "Майдонга ғалабани кўзлаган ҳолда тушамиз"

Самвел Бабаян ("Пахтакор" бош мураббийи): - Бизни қизиқарли ўйин кутиб турибди. Тошкентда жамоалар бир-бирига муносиб рақиб эканлигини исботлашди. "Ал Айн" Осиёнинг энг кучли клубларидан бири. Тошкентдаги мағлубиятимиз ўйинга тўғри келмаганди. Ўша баҳсда рақиб омадлироқ чиқди. Вазифамиз энг яхши ўйинларимиздан бирини кўрсатиш. Бизни ижобий натижа қониқтиради.

Рақиб легионер футболчиларсиз ҳам кучли жамоага эга. Ҳар бир чизиқда ва захира ўриндиғида ҳам маҳоратли ўйинчилари бор. Бизда эса клуб фалсафаси бошқачароқ. Асосий урғуни маҳаллий футболчиларга қаратамиз. Тошкентдаги беллашувда 20 ёшли Жавоҳир Соҳибов ўзидан ёмон таассурот қолдирмади. Ушбу таркиб билан Осиёда рақобатбардош жамоалардан бирига айланишимиз керак. Янги стадионида "Ал Айн" ҳозирча ютқазмади, лекин ҳар қандай сериянинг якуни бўлади. Биз эртага чиройли футбол кўрсатиб, ғалаба қозониш учун майдонга тушамиз.

Станислав Андреев ("Пахтакор" ярим ҳимоячиси): - Ўйин кескин кечади деб ўйлайман. Мухлисларимиз олдида ишончни оқлаш учун ғалаба қозониш мақсадида келдик. Жамоада кайфият жуда яхши ва 3 очкони қўлга киритиш учун бор кучимизни берамиз.