Рустам Хожаев: "Осиё кубоги мезбонлиги Марказий Осиё футболи ривожи учун жуда катта туртки бўлади"

"Хўжанд" жамоаси мазкур йиғин доирасида "Оқтепа", "Арал", "Сурхон" билан назорат учрашувларида иштирок этди. Сайтимиз журналисти Абдулазиз Искандаров қўшниларимизнинг янги мавсумга тайёргарлиги хусусида "Хўжанд" бош мураббийи Рустам Ходжаевга юзланди.

- Рустам Назриевич Тошкентдаги йиғин кўнгилдагидек кечдими? 

- Янги мавсумга тайёргарликни январь ойида бошладик. Дастлабки босқичларни ўз қароргоҳимизда олиб борган бўлсак, кейинги машғулотлар Тошкентда сунъий майдонларига кўчди. Илк турни "Истиқлол"га қарши ўтказамиз. Бу борада пойтахт йиғини айни муддао эди. Ҳаммаси кўнгилдагидек кетмоқда. Муҳими чемпионатга муносиб тайёргарлик кўриш. 

- "Хўжанд" доим совриндорлар қаторида бўлади. Янги мавсумда мақсадлар қандай?

- "Хўжанд" Тожикистоннинг етакчи жамоаларидан бири, ўз олдига ҳар йили юқори мақсадларни қўяди. Бу йил мақсадимиздан чекинмаймиз. Биздан фақат олдинга интилиш талаб этилади.

- Таркибда ўзбекистонлик футболчилардан кимлар қўшиб олинди?

- Таркибга ўзбекистонлик, россиялик, нигериялик футболчиларни қўшиб олдик. Асилжон Бегимқулов олдин ҳам бу ерда ўйнаган, унга жамоа бегона эмас. Комолафе эса Ўзбекистон Суперлигасида тўп тепган. Ўйлайманки, мавсум стартигача таркибимиз оптимал ҳолатга келади.

- Ўзбекистон Суперлигасида қайси жамоаларнинг трансферлар қизиқтира олди?

- Қўшнимиз бўлган Ўзбекистон чемпионатини доим катта қизиқиш билан кузатамиз. Ўртоқлик учрашувларига борамиз. Айтишим мумкинки, жамоалар қишда қизиқарли трансферларни амалга оширишди. "Пахтакор", "Насаф", "Навбаҳор", "Нефтчи" ва ҳоказо. Чемпионат баҳслари ҳам шунга монанд равишда ўтади деб тахмин қиламан. 

- Осиё кубогига Марказий Осиё мамлакатларининг мезбонлик учун ҳаракатини қандай қабул қилдингиз?

- Осиё кубогига Марказий Осиё мамлакатларининг мезбонлик қилишидан фақат фахрланиш мумкин. Бу футбол ривожига жуда катта туртки бўлади. Агарда чемпионат бизга ишониб топширилса, келажак учун ҳам фойдаси тегади.