Рустам Умаров: “Навбатдаги Жаҳон чемпионатида иштирок этаманми ёки йўқ билмайман”

Терма жамоамиз аъзолари куни кеча юртимизга қайтиб келди. Биз Ўзбекистон терма жамоаси дарвозабони Рустам Умаровни офисимизга таклиф қилдик ва мундиалдаги иштирок ҳақида суҳбатлашдик.

-  Мундиалга боришдан аввал Тошкентда Озарбайжон футзал терма жамоаси билан 2 та назорат ўйинида майдонга тушдинглар. Кейин эса Теҳронда Эрон билан  Португалия шаҳрида Испания ва Португалия терма жамоасига қарши баҳс олиб бординглар. Тайёргарлик қанчалик аъло даражада бўлди дея оласиз?
-  Мундиалга боришдан олдин Тошкентда Озарбайжон терма жамоасига қарши 2 та ўртоқлик ўйини ўтказдик. Теҳронда Эрон билан 2 та назорат ўйини ўтказдик. Эрон терма жамоасига қарши учрашувдан олдин Озарбайжон билан ўйнаганимизда биз ўсишга эришдик. Эрон терма жамоасига қарши ўйин осон бўлди. Тўпни ўзимиз назорат қилдик, ҳужумлар уюштирдик. Яна ўша ўзимизнинг хатоларимиз туфайли голлар ўтказиб юбордик. Кейин биз Португалияга йўл олдик ва у ерда Португалия ва Испания терма жамоалари билан 2 та ўртоқлик ўйини ўтказдик. Биринчи баҳсда Португалия терма жамоаси билан ўйнадик. Биринчи бўлимда ёмон ўйин кўрсатмадик, қаршиҳужумлар уюштирдик. Яна ўзимизни хатоларимиз туфайли дарвозамиздан гол ўтказиб юбордик. Яхши ўйин кўрсатиб ҳимояландик, ҳужумлар уюштирдик, прессингдан чиқиб кетдик. Бизда кўплаб голга тортадиган вазиятлар бўлди аммо улардан фойдалана ололмадик. Биринчи бўлимни 2:1 ҳисобида якунладик. Иккинчи бўлимда майдонга чиқиб яна ўз ўйинимизни кўрсатишга ҳаракат қилдик. Афсуски яна ўзимизнинг аҳмоқона хатоларимиз туфайли ўз дарвозамиздан гол олиб чиқдик. Мен Португалия терма жамоаси билан бўлган ўртоқлик ўйини ҳақида гапиряпман. Кейинги ўртоқлшик ўйини Испания терма жамоаси билан бўлди. Ушбу ўйинга жуда яхши тайёргарлик кўрдик. Чунки Испания дунё бўйича энг кучли терма жамоалардан бири ҳисобланади. Ушбу ўйинда ҳам яхши тўпни ўз назоратимизга олдик, яхши ҳимояландик. Биринчи бўлимни 1:0 ҳисоби билан якунладик. Менимча, бу ёмон натижа эмас деб ўйлайман. Иккинчи бўлимда майдонга чиқиб яна ўша аҳмоқона хатоларимиз туфайли ўз дарвозамиздан гол олиб чиқдик. Яна бир нечта назорат ўйинларини ўтказганимиздан сўнг бизда ўйин даражамиз янада ошди. Бундай даража билан биз Колумбияга бордик.

-  Айтиб ўтдингиз, ўзимизни хатоларимиз туфайли дарвозамиздан гол ўтказиб юбордик деб. Мана шу хатоларни бартараф этиш учун шуни устида кўпроқ ишламадингларми?
-  Ушбу хатолар ўйин пайтида бўлади. Бундай хатоларни қандай бартараф этишни билмайман. Нимага бундай бўлаётганини ўзимиз ҳам билмаяпмиз. Кичик хатолар туфайли ўз дарвозамиздан гол ўтказиб юборяпмиз. Бизни мудофа чизиғимиз жуда ҳам кучли. Рақибларга ҳам ҳимоя чизиғимизни ёриб ўтиш жуда қийин. Аммо, ўзимизнинг хатоларимиз туфайли гол ўтказиб юборяпмиз.

-  Мундиалдаги илк тарихий ўйинда Панамани бемалол мағлуб этсанглар бўларди. Ўша учрашувда қандайдир хаяжон туфайли мағлубиятга учрадингларми?
-  Албатта, ўйин бошланишидан олдин мадҳиямизни куйлаётганимизда жуда ҳам кучли хаяжон бор эди. Лекин, учрашув бошланганда эса бор эътиборимизни майдондаги вазиятга қаратдик. Ушбу ўйинда голга тортадиган вазиятлар кўп бўлди. Лекин, биз тепган тўплар дарвоза чизиғини кесиб ўтмади. Билмадим, худди уларни дарвозалари сеҳрлаб қўйилгандек. Биринчи бўлимда 5, 6 та хавфли вазиятлар бўлди. Биз Панамани бемалол мағлубиятга учратамиз деб ўйладим. Яна ҳимояда бироз хотиржамликка берилдик ва гол ўтказиб юбордик. Биринчи бўлимни 1:0 ҳисобида якунладик. Иккинчи бўлимда жуда ҳам кучли ҳужумлар уюштирдик. Аммо, ҳимоядаги қўпол хатойимиз туфайли дарвозамиздан гол ўтказиб юбордик. Ушбу ўйинда 100 фоизлик натижа қайд этишимиз керак эди. Бемалол ғалаба қозонсак бўларди, лекин қанақасига бундай бўлди билмайман.

- Гуруҳдаги иккинчи турда Колумбия терма жаоасига қарши баҳс олиб бординглар. Учрашувнинг сўнгги дақиқасига қардар ўйинни сизлар назорат қилдинглар. Арзимаган 13 сония тарихий ғалабани нишонлашга йўл қўймади...

-  Панама билан бўлган ўйиндаги мағлубиятдан сўнг, барча жамоадошларимиз билан йиғилиб ушбу ўйинда фақат ғалаба қозонамиз деб гаплашиб олган эдик. Колумбияга қарши юаҳс олиб бориш учун майдонга чиқиб келдик. Сстадиондаги муҳит аъло даражада эди. Худди ўзимизни ўз уйимизда ўйнаётгандек тасаввур қилдик. Биринчи бўлимни ёмон бошламадик. Илк имкониятдан унумли фойдаландик ва рақиб дарвозасини ишғол қилдик. Рақимиз Колумбия терма жамоаси ҳам дарвозамизга гол уриши мумкин эди. Қаердадир ҳимяда яхши ўйнашди яна қаердадир мен ўз дарвозамни яхши мудофа қилдим. Биринчи бўлимни 2:1 ҳисобида якунладик. Иккинчи бўлимда майдонга чиқиб рақиблар дарвозасини яна ишғол қилдик. 3:1 ҳисобида олдинга чиқиб олган эдик. Яна голга тортадиган вазиятлар бор эди. Ўшаларни голга айлантира олмадик. Иккинчи бўлим тугашига таҳминан 5 дақиқа қолганида рақиб ўйновчи дарвозабонни майдонга туширди. Хатойимиз туфайли яна дарвозамиздан гол ўтказиб юбордик. Биз ғалаба қозонишимиз керак эди. Афсуски, дуранг натижа қайд этдик.

-  Бундай натижадан кейин ҳам сизларда кейинги босқичга чиқиш учун имконият сақланиб қолган эди. Фақат гуруҳдаги 3-турда Португалия терма жамоасини мағлубиятга учратишинглар шарт эди...
-  Иккинчи турда дуранг натижа қайд этган бўлсак ҳам гуруҳдан чиқишимиз учун имконият бор эди. Фақат Португалия терма жамоасини мағлубиятга учратишимиз керак эди. Португалия билан бўлган ўйинда йўқотадиган ҳеч нарсамиз йўқ эди. Ёки бор ёки йўқ. Ушбу учрашувда ҳам жиддий тайёргарлик кўрдик. Португалияга қарши майдонга тушиб тўпни ўз назоратимизга олгандик. Стандарт вазиятда ҳимоячиларимизнинг эътиборсизлиги туфайли Рикардиньо бир ўзи жарима майдончамиз ёнида қолган эди. У эса ўзига узатилган тўпни дарвозамизга жойлаб қўйди. Улар икки, учта гол уриб олишгандан сўнг руҳланиб кетишди. Шундан сўнг улар ўйинни ўз назоратларига олишди. Биз эса бундай вазиятдан қандай чиқишни билмай қолдик. Биз ғалаба қозониб кейинги босқичга чиқиш учун ҳаракат қилдик. Менимча бизга бироз омад етишмади деб ўйлайман.

-  Колумбиядан қандай таассуротлар билан қайтдинглар?
-  Жуна ҳам узоқ кутилган илк жаҳон чемпионатимиз. Менга жуда ҳам ёқди. Биз узоқ вақт мундиалга чиқиш учун ҳаракат қилгандик, орзу қилгандик. Мундиалнинг илк ўйинида худди, ўзимизда бўлиб ўтган Осиё чемпионатидек тасаввур қилдим. Осиё чемпионатида бўлгани каби қаттиққўл ҳакамлар, ташкилотчилик, барчаси аъло даражада эди. Энди бу жаҳон чемпионати.

-  Ушбу Жаҳон чемпионати Осиё чемпионатидан сўнг иккинчи ёдда қоларли воқеа бўлдими?
-  Албатта, биз Европа жамоалари билан куч синашдик. Жаҳон чемпионати билан Осиё чемпионати орасида катта фарқ бор. Албатта, бу ёдимизда қолади. Колумбия билан баҳс олиб борганимизда, мухлислар жуда ҳам кўп эди. Майдондаги муҳит жуда ҳам зўр эди. Медилинга борганимизда эса мухлислар чиройли ўйин кўриш учун аренага ташриф буюришганди. Биз билан Колумбияга бориб бизни қўллаб-қувватлаб турган 2, 3 нафар мухлисимизни алоҳида эътироф этмоқчиман. Улар аренага ташриф буюрган мухлисларни бизни қўллаш учун ўзимиз тарафга оғдириб олди (кулади). Менимча барча мухлислар бизга мухлислик қилишди. Ўйинни бўлса ўзинглар ҳам кўрдинглар, бироз омадсиз иштирок этдик.

-  Гуруҳдаги қайси жамоага қарши қийин ўйин ўтказдингиз?
-  Менимча Колумбияга қарши жуда ҳам қийин учрашув бўлди деб ҳисоблайман. Боя айтиб ўтганимдек ўша учрашувда ҳимояландик, кўп тер тўкдик. 2 та тўп фарқи билан ғалаба қозониб турганимизда, сўнгги дақиқаларда дуранг натижа қайд этиш жуда ҳам аламли. Менмча ушбу учрашувни узоқ вақт ёдимдан чиқармасам керак.

-  Вақт тафовутидан қийналмадингларми?
-  У ердаги вақтга мослашиш учун мундиалдан бироз олдин Колумбияга етиб боргандик. Биринчи кунимиз жуда ҳам оғир бўлди. Атайлаб машғулотимизни кечги вақтда ўтказдик. Машғулотда кўзларимиз юмилиб ухлаб қолишимиз ҳам мумкин эди. Жуда ҳам ноқулай бўлди. У ердаги вақтга мослашиш учун ҳам мураббийлар штаби машғулотларни эрталаб эмас кечки пайт амалга оширди.

-  У ерда қандай таомларни истеъмол қилдинглар?
-  Менимча ҳамма жойда ошхоналар бир хил бўлса керак. Шветча стол, гуруч, макарон, лекин уларни овқатини кимдир ея олади яна кимдур ея олмайди. Биз Испанияда бўлганимизда мураббийимиз Пулпис яшайдиган шаҳарда бизни бир охшонага таклиф қилди. Олдимизга саккизоёқдан тайёрланган таомни махсус идишда олиб келишди. Аввалига ушбу таомни ейиш учун бироз кўнглим тортмади. Кейин татиб кўрганимдан сўнг мазаси оғзимда қолди. Тузи ҳам барча нарсаси жойида эди. Шунақанги ёқимли эди. Таомнинг ҳаммасини паққос туширдим. Саккизоёқ менга ёқди.

-  Мундиалда ёдда қоларли вазиятлар бўлдими?
-  Колумбияга қарши учрашувда улар жуда кўп вазиятларда дарвозамизни ишғол қилиши мумкин эди. Лекин мен ўз дарвозамни голдан қутқариб жамоадошларим жонига оро кирдим. Буна ҳам узоқ вақт ёдимдан чиқармасам керак. Буни алоҳида видеоролик қилиш керак (кулади).

-  Колумбияда қизиқарли воқеалар бўлдими?
-  Нафақат Колумбияда биз терма жамоа билан бирга бўлганимизда “дон-дон зики” деган ўйин бор. Жамоадошларим билан лифтда бўладими ёки меҳмонхона йўлакларида бўладими биз мана шу ўйинни ўйнаймиз. Ушбу ўйинда ким мағлуб бўлса ёки ерга таянган ҳолда ётиб туриш ёки ўмбалоқ ошиш машқларини бажарарди. Бу биз учун жуда ҳам қизиқарли ўйин эди.

-  Ушбу ўйинда ким кўпроқ мағлуб бўлган?
-  Асосан ёш жамоадошларим мағлуб бўларди. Ёши катталар тажрибали  бўлади. Биз ўзаро келишиб олардик. “Учқудуқ” деса барча бир хил нарса қиларди (кулади).

-  Колумбия билан бўлган ўйинда россиялик шарҳловчи “жалка Рустам” деб айтганди...
-  Албатта, бу жуда ҳам ёқимли. Ўзбекистондаги барча мухлисларимиз ижтимоий тармоқларда бизни қўллаб-қувватлашди. Улар ёзиб қолдирган изоҳларини деярли барчасини ўқиб чиқдик. “Арена”, “Матч” телеканаллари барча ўйинларни эфирга узатишди. Ўша телеканалларнинг бирида ишловчи Аркадий Белий бор. Аввал ушбу инсон Россиянинг “Дина” жамоасида ўйнаган. Биз ушбу жамоа билан учрашув ўтказиш учун Россияга борганимизда Аркадий Белий “Дина” жамоасини директори эди. Ўшанда “Дина” билан бўлган учрашувда 3:3 натижасини қайд этгандик. Ўшанда Аркадий Белый мени эслаб қолган эди. Ўйиндан сўнг Аркадий Белый ёнимга келиб Рустам ажойиб ўйин кўрсатдинг табриклайман деганди. Мана йиллар ўтиб Колумбия билан бўлган учрашувни Аркадий Белий шарҳлади. Балки мени эслагандир. Бундай ёдга олишлар жуда ҳам ёқимли.

-  Мундиалда жуда ҳам ажойиб ўйин кўрсатдинглар. Балки хориж клублари селекционерлари Колумбияга ташриф буюришгандир. Балки сизларги қизиқишгандир. Агарда жиддийроқ таклиф бўлса қабул қиласизми?
-  Бўлишми мумкин. Ҳозирча ҳеч гап йўқ. Балки бирон-бир янгилик бўлиб қолар. Агарда шундай бўладиган бўлса биринчилардан юздиб хабардор бўласиз. Агарда таклиф бўлиб қолса қабул қилардим. Европа давлатлари чемпионатида иштирок этишни хоҳлайман. Кейинги Жаҳон чемпионатида иштирок этаманми ёки йўқ билмайман. Ўшанда мен 36 ёшда бўламан. Лекин, ҳозиргача ўйнаётган 36, 37 ёшли дарвозабонлар бор. Буни вақт кўрсатади.

-  Сўнгги сўз ўрнида мухлисларга тилакларингиз.
-  Мундиалда бизни қўллаб-қувватлаб турган мухлисларимизга катта раҳмат айтаман. ижтимоий тармоқ орқали ўзларини изоҳлари билан бизни қўллашди. Биз мағлуб бўлдик, дуранг ўйнадик ва мусобақани тарк этдик. Шунга қарамай мухлисларимиз оҳиригача бизни қўллашда давом этишди. Биз уйимизга ёриқ юз билан қайтиб келдик. Бизни яхши кутиб олишди, бунинг учун барчага раҳмат айтаман. Шунингдек мундиални тўлиқ ёритиб борган ОАВ вакиллари бўлган championat.asia сайтига алоҳида раҳмат айтаман. Мундиалдаги барча янгиликлар ўз вақтида сайтда чоп этилди. Биз буларни барчасини сайтда кузатиб бордик. Бунинг учун барчангизга катта раҳмат айтаман.

Жаҳонгир Сотволдиев суҳбатлашди.