Рустам Қурбонбоев: “Бешинчи ўрин бизга ярашмайди”

Яқинда унинг гуруҳи Қозоғистонда бўлиб ўтган Антон Рохосович Шох хотирасига бағишлаб ўтказилган турнирида иштирок этиб қайтди.

Мазкур мусобақада Рустам Қурбонбоев шогирдлари бешинчи ўринни эгаллашди. Албатта, жами саккизта жамоа иштирок этган турнирда бешинчи ўрин билан қайтиш “Пахтакор” учун қониқарли натижа ҳисобланмайди. Бу ҳақда мураббийнинг ўзи ҳам айтиб ўтди.

“Хотира турнири яхши савияда ўтди, - дейди Рустам Қурбонбоев. - Ташкилий ишларнинг ҳаммаси жойида бўлди. Энди ўтказган ўйинларимизга келсак, гуруҳда дастлаб “Дордой” билан дуранг ўйнадик, кейинги баҳсда “Бунёдкор”га ютқазиб қўйдик ва учинчи ўйинда Олма-Ота жамоасини мағлуб этдик. Натижада гуруҳда учинчи ўринни эгалладик. Плей-офф баҳсларида эса аввалига “Спартак” (Тошкент), ундан кейин яна ўша Олма-Ота жамоасини мағлуб этиб, якунда бешинчи ўринни олдик. Олдимизга қўйилган вазифа “Пахтакор” учун ўйинчи етказиб беришдир. Бу борада ишлаяпмиз. Хотира турнирида жамоамиздан Георгий Аҳмедов “Томошабинлар меҳрини қозонгани учун” соврини билан тақдирланди. Бу ҳам бизни хурсанд қилди”.

Қуйида “Пахтакор-99”нинг хотира турнирида қайд этган натижалари ва голлар муаллифини келтириб ўтамиз.

Гуруҳ баҳслари
“Пахтакор-99” - “Дордой” (Бишкек) - 1:1
Гол: Роман Жўраев.

“Пахтакор-99” - “Бунёдкор” (Тошкент) - 0:1

“Пахтакор-99” – СДЮШОР-2 (Олма-Ота) - 3:0
Голлар: Сарвар Солиев (2та), Ойбек Ҳамидов.

Плей-офф баҳслари
“Пахтакор-99” - “Спартак” (Тошкент) - 3:2
Голлар: Рамил Саркаев (2та), Сарвар Солиев.

“Пахтакор-99” – СДЮШОР-2 (Олма-Ота) - 7:1
Голлар: Сарвар Солиев (2та), Георгий Аҳмедов (2та), Рамил Саркаев, Роман Жўраев, Ойбек Ҳамидов.