Рўзиқул Бердиев: «Муҳаммаджон Раҳимовнинг виза билан муаммоси бор»

Бугунги ўйин рақибнинг режаси бўйича кетди. Жамоа сабр билан яхши ҳимояланди. Бундай голларни уриш жуда қийин. “Андижон” битта имкониятдан фойдаланди. Улар кўп вақт давомида ҳимояланишди, вақт кўзишди ва қарши ҳужумда яхши ҳаракат қилишди. Биз доимгидек ўз имкониятларимиздан фойдалана олмадик. Умуман олганда, биз охирги вақтларда уй учрашувларида қийинчиликларга учрамоқдамиз. Бу ҳолат ўтган йили ҳам содир бўлганди, бу йил ҳам давом этмоқда. Биз буни сабабини ўрганамиз.

Бугунги учрашувда жамоага нима етишмади?

- Маҳорат. Олдинда ҳаракат қилган футболчиларнинг маҳорати етишмади. Буни тўғирлашга ҳаракат қиламиз, бу бизнинг доимги муаммомиз бўлган. Кейин рақиблар Қаршига келганда кўпроқ ҳимояланмоқда ва бу янада қийинчилик туғдирмоқда. Шу сабабли яримта вазиятдан ҳам гол уришимиз керак.

Бугунги учрашувда тожикистонлик легионерни кўрмадик...

- Бунга бир нечта сабаблар бор. Кимдадир жароҳат бор, кимдадир виза билан муаммо бор. Биз бу ҳолатни кеча билдик. Албатта, кейинги ўйинларга улар ҳаракат қилишади.

Биринчи ва иккинчи бўлимда кўплаб хатолар бўлди. Бугун “Насаф” 90 минутга тайёр эмасдек кўринди. Бугунги мағлубиятга “Насаф”нинг жисмоний ҳолати ҳам сабаб бўлдими?

- Энди жисмоний ҳолатни сиз аниқлаб бера олмайсиз. Агар бизда жисмоний ҳолатда муаммо бўлганида биз охиргача ҳужум қилмаган бўлар эдик. Кейин бугун биринчи учрашув бўлгани учун рақиб кўпчилик билан ҳимояланди. Бизда хатолар бўлди, буни пала-партишлик бўлди демаган бўлардим. Шу сабабли жамоамда шошилиш ва асабийлик кузатилди. Бу эса рақибга қўл келди.