Роналдунинг "Ал Насср"га ўтиши – катта режанинг бир қадами

ЖЧ вақтида "Манчестер Юнайтед"дан кетган Криштиану Роналду Саудия Арабистонининг "Ал Насср" жамоасига кўчиб ўтишга яқин.

"Marca" маълумотларига кўра, Дубайга етиб борганидан кейин у Саудия Арабистони томон отланади. "Ал Насср" Роналдунинг декабрь ойи охиригача клубга келишини кутмоқда.

Криштиану клуб билан 2025 йил июнигача шартнома имзолайди ва ҳар мавсумда 200 миллион евро ишлаб топади (бу миқдор иш ҳақи ва реклама даромадларини ўз ичига олади).

Саудия Арабистони Роналдунинг "Ал Насср"га ўтиши маҳаллий футболни ривожлантириш учун ҳаракат деб ҳисоблайди. Мамлакат 2030 йилги Жаҳон чемпионатини ўтказиш ҳуқуқига эгалик қилишга интилмоқда. Ўзини спорт ва футбол олами харитасига киритиш учун мамлакат аллақачон Испания Суперкубоги ўйинларини ташкил қилмоқда, шунингдек, Formula-1 босқичи, гольф ва от пойгалари мусобақаларини ўтказмоқда. Ушбу ҳаракатларнинг мақсади ЖЧ-2030ни мезбони бўлиш сифатида кўрилмоқда.

Роналду Дубайда бир неча кунлик таътилни ўтказади ва кейин Саудия Арабистонига боради.