ПСЖ янги киберспорт лойиҳасини ишга туширмоқда

Афсоналар Лигаси ўйини бўйича беш карра Европа чемпиони Бора Ким (YellowStar), ESWC 2015 талқинига кўра киберфутбол бўйича амалдаги жаҳон чемпиони Август Росенмайер (Agge) ва франциялик иқтидорли киберфутболчи Лукас Кулье (DaXe) миллий, Европа ва халқаро киберспорт турнирларида ПСЖ шарафини ҳимоя қилишади.

Бир неча кун олдин бу трио "Парк де Пренс"даги матбуот-анжуманида клуб билан шартнома тузди.

ПСЖ киберспортда ҳам етакчи бўлишга уринмоқда.

"Биз киберспортга инвеститция киритиб ва икки асосий ўйинда иштирок этмоқчимиз. Бу қарор билан "рақамлаштириш" лойиҳамизни ишга туширамиз ва клубимизнинг янги мухлислари пайдо бўлади. Бизда яқин 3 йил учун яна катта режалар бор" - дейди ПСЖ президенти Носир Ал-Ҳелайфи.

Бора Ким (YellowStar) клубга менежер ва мураббий сифатида таклиф этилди. Бора ПСЖнинг Афсоналар Лигаси жамоаси учун ўйинчилар танлови билан шуғулланади. Шу билан бирга, Бора киберфутбол таркибига ҳам жавоб беради.

Август Росенмайер (Agge) ва Лукас Кулье (DaXe) Парижда бўлиб ўтадиган жаҳон чемпионатида иштирок этишади.

Эслатиб ўтамиз, 27 октябрдан 2 ноябргача ўтадиган ESWC 2016 жаҳон чемпионатида Ўзбекистон ҳам иштирок этади. Ушбу турнирдаги ягона ўзбекистонлик Муҳаммадамин Турғунбоев бўлади. У FIFA17 бўйича ватанимиз шарафини ҳимоя қилади.