"Президент Мирзиёевга келаси йили футзал бўйича Жаҳон чемпионатида учрашишни интиқлик билан кутаётганимни айтдим" — Жанни Инфантино

"Нью-Йоркда Ўзбекистон Республикаси Президенти Шавкат Мирзиёев билан учрашганимдан мамнунман.

Мен у кишини гўзал мамлакати майдонда эришаётган муваффақият билан табрикладим ва FIFA Forward дастуридаги ажойиб иштирок учун миннатдорчилик билдирдим.

Мен ўтган йилнинг май ойида уларнинг Тошкентдаги янги футбол академиясига ташриф буюриш имконига эга бўлдим ва у ердаги шароитлар нафақат Ўзбекистон, балки бутун Осиё қитъаси фахрига айланади деб айта оламан.

Шунингдек, Президент Мирзиёевга келаси йили футзал бўйича Жаҳон чемпионатида учрашишни интиқлик билан кутаётганимни ва бу жуда муваффақиятли бўлишига ишончим комиллигини айтдим. Бу эса минтақа аҳлини бирлаштириш ва Ўзбекистонни футбол марказига айлантириш учун яна бир имконият бўлади", – деди Инфантино.

ФИФА президенти учрашув чоғида давлат раҳбарига унинг исми туширилган тўпни совға қилди ва Ўзбекистонни ЖЧ мезбонлиги билан табриклади. 

Маълумот учун, футзал бўйича Жаҳон чемпионати кейинги йилнинг 14 сентябридан 6 октябрига қадар Ўзбекистонда ўтказилади. Кеча миллий терма жамоага испаниялик машҳур мутахассис Хосе Венансио Лопес бош мураббий этиб тайинланди.