"Олмалиқ" ва пенальти

Қуйида сизнинг ҳукмингизга ҳавола этаётган статистикамизда жамоамиз дарвозаси томон белгиланган пенальтилар хусусида сўз юритамиз.

Жамоамиз кеча "Бухоро"га 0:2 ҳисобида имкониятни бой берди. Ҳар иккала гол Умид Хонимқулов қўриқлаётган дарвозага пенальтидан киритилди. Бу каби ҳолат жамоамиз учун биринчи марта эмас. Ортга назар ташлайдиган бўлсак, дастлаб 2008 йил "Олмалиқ"нинг сафарда "Пахтакор"га қарши ўйинида ҳакам Вадим Агишев икки марта пенальти белгилаган. Одил Аҳмедов ва Зайниддин Тожиев бу имкониятдан унумли фойдаланишган. Иккинчи марта бу ҳолат ўз майдонимизда 2013 йилда содир бўлган. "Насаф" жамоаси билан 2:2 ҳисобида якунланган баҳсда бош ҳакам Бахтиёр Намозов икки марта меҳмон жамоа пенальти тепишини қайд этган. Артур Геворкян ҳар иккисидан унумли фойдаланган. Намозов бу баҳсда "Олмалиқ" фойдасига ҳам битта пенальти белгилаган. Зафар Полвонов пенальтидан унумли фойдалана олмаган. Демак бу каби ҳолат жамоамиз тарихида Бухоро шаҳрида учинчи марта кузатилди.

Умумий ҳисобда 2008 йилдан бери олий лигада иштирок этаётган жамоамиз дарвозаси томон белгиланган пенальтилар сони 35тага етди. Ушбу пенальтилардан 5таси дарвозабонларимиз томонидан қайтарилган. Уй-сафар тизимида ҳисоблайдиган бўлсак 11 марта ўз майдонимизда ва 24 марта рақиб майдонида дарвозамиз сари пенальти белгиланган.